ახალი ამბებისამართალი

საპატრიარქოს იურისტი მომხრეა, საჯარო იყოს დეკანოზის სასამართლო პროცესი

5 მაისი, 2017 • 4265
საპატრიარქოს იურისტი მომხრეა, საჯარო იყოს დეკანოზის სასამართლო პროცესი

ე.წ. ციანიდის საქმის სასამართლო განხილვას დაესწრება საპატრიარქოს იურისტი ედიშერ ქარჩავა. როგორც ადვოკატი აცხადებს, ის პროცესს დაესწრება, როგორც დაინტერესებული მხარე:

“ჩემთვის, როგორც საპატრარქოს იურისტისთვის, საინტერესო იქნება ორივე მხარის პოზიცია და არგუმენტები საქმის დასაბუთებულობასთან დაკავშირებით. ასევე, განსაკუთრებით მნიშვნელოვანია თუნდაც დაცვის მხარის შუამდგომლობა, სისხლისსამართლებრივი დევნის შეწყვეტასთან დაკავშირებით რამდენად არის დასაბუთებული და რა არგუმენტები გააჩნიათ,” – ამბობს იურისტი.

ედიშერ ქარჩავას თქმით, ის მომხრეა, რომ სხდომა საჯარო იყოს, რათა ამ საკითხზე საზოგადოებას არ დარჩეს კითხვის ნიშნები:

“ჩემი აზრით, სხდომა ღია უნდა იყოს. ვინაიდან არ უნდა დარჩეს რაიმე კითხვის ნიშნები” – ამბობს ქარჩავა.

დღეს, 5 მაისს, თბილისის საქალაქო სასამართლოში, მოსამართლე ბადრი შონია განიხილავს დეკანოზ გიორგი მამალაძის საქმეს, რომელსაც ბრალად პატრიარქის მდივან რეფერენტის, შორენა თეთრუაშვილის ანგარებით მკვლელობის მომზადება ედება. ასევე, ცეცხლსასროლი იარაღის უკანონოდ შენახვა (სსკ 18, 109 და 236-ე მუხლები).

მამალაძისთვის წარდგენილი ბრალდებები სასჯელის სახედ და ზომად ითვალისწინებს 16-დან 20 წლამდე თავისუფლების აღკვეთას.

წინასასამართლო სხდომა 11:00 საათისთვისაა დანიშნული. სხდომის პარალელურად გიორგი მამალაძის მხარდამჭერებს გამოცხადებული აქვთ, რომ ისინი გამართავენ აქციას სასამართლოსთან.

უცნობია, დაიხურება თუ არა დღევანდელი პროცესი, პროკურატურას სურს, რომ ეს პროცესი იყოს დახურული, თუმცა საჯარო განხილვის მომხრეა ბრალდებული.

გამოძიების ცნობით, 2017 წლის 2 თებერვალს საქართველოს კათოლიკოს-პატრიარქი შორენა თეთრუაშვილთან და სხვა პირებთან ერთად სამკურნალოდ გაემგზავრა გერმანიაში.

“გიორგი მამალაძემ აღნიშნული ფაქტი მიიჩნია ხელსაყრელ ვითარებად, ვინაიდან უცხო ქვეყნის ტერიტორიაზე დანაშაულის ჩადენის შემთხვევაში შეინიღბებოდა მისი განზრახვა. ამავდროულად, მომწამვლელი ნივთიერების გამოყენებით გამოწვეული სიკვდილის მიზეზისა და დანაშაულის ჩამდენი პირის დადგენა გართულდებოდა საგრძნობლად”, – აცხადებს პროკურატურა.

გამოძიების ცნობით, გიორგი მამალაძემ უმოკლეს ვადაში შეიძინა შორენა თეთრუაშვილის მკვლელობის ჩასადენად განკუთვნილი 0,8740 გრამი მომწამვლელი ნივთიერება, „ნატრიუმის ციანიდის“ შემცველი ფხვნილი.

2017 წლის 10 თებერვალს, გერმანიაში გამგზავრებამდე, თბილისის საერთაშორისო აეროპორტში გიორგი მამალაძე დააკავეს. პროკურატურის ცნობით, მისი ბარგის დათვალიერებისას ამოიღეს ფარულად შენახული, მკვლელობის ჩასადენად განკუთვნილი მომწამვლელი ნივთიერება “ნატრიუმის ციანიდი”.

თავად გიორგი მამალაძე ბრალდებებს არ აღიარებს. იგი ამბობს, რომ ციანიდის შეძენა მას თავად შორენა თეთრუაშვილმა სთხოვა, თუმცა საბოლოოდ არ შეუძენია, ციანიდი მის ბარგში არ ყოფილა და ჩაუდეს.

მასალების გადაბეჭდვის წესი