“ნაციონალური მოძრაობის” საპარლამენტო ფრაქციის თავმჯდომარის, რომან გოცირიძის განცხადებით, თუ საპარლამენტო უმრავლესობა პრეზიდენტის ვეტოს დაძლევს, ეს მათი მორიგი შერცხვენა იქნება.
“პრეზიდენტის ვეტო არაერთხელ აღმოჩნდა სწორი. იგივე ეროვნული ბანკის გახლეჩვასთან დაკავშირებულ კანონპროექტზე და ბევრ სხვა შემთხვევაში, როცა საკონსტიტუციო სასამართლოში გასაჩივრდა კანონი. უმრავლესობა, ეტყობა, დიდ გულზეა, ვინაიდან საკონსტიტუციო სასამართლოში საკუთარი მოსამართლე ჰყავს. მანდატი ჩამოართვეს და მანდატით შემოსეს მანანა კობახიძე და, ეტყობა, იმედი აქვთ, რომ სასამართლო ხელმეორედ უკან არ დააბრუნებს მოსმენებზე კანონს,” – ამბობს რომან გოცირიძე.
მისივე აზრით, სახელმწიფო უსაფრთხოების სამსახურში შექმნილი უწყება დამოუკიდებელი არ არის:
“ეს იმდენად ნათელია, რომ ძალიან გაუძნელდება საკონსტიტუციო სასამართლოს, იგივე გადაწყვეტილება არ მიიღოს ამ კანონზე, რაც ერთხელ უკვე მიიღო. ეს კანონპროექტი სასამართლოს განჩინებას არ შეესაბამება.”
საქართველოს პრეზიდეტმა, გიორგი მარგველაშვილმა დღეს, 20 მარტს მოსმენების შესახებ კანონპროექტს ვეტო დაადო.
პარლამენტის მიერ სამი მოსმენით მიღებული კანონის თანახმად, სახელმწიფო უსაფრთხოების სამსახურის დაქვემდებარებაში შეიქმნება სსიპ ოპერატიულ-ტექნიკური სააგენტო, რომელიც ფარულ მოსმენებს განახორციელებს.
პარლამენტმა შეცვალა მოსმენების არსებული კანონმდებლობა, რადგან საკონსტიტუციო სასამართლომ “ეს შენ გეხებას” სარჩელის საფუძველზე მოსმენების არსებული წესი არაკონსტიტუციურად ცნო.
“ეს შენ გეხებაში” შემავალ არასამთავრობო ორგანიზაციები აცხადებენ, რომ ასევე არაკონსტიტუციურია ფარული მოსმენების ის მოდელი, რომელიც პარლამენტმა მიიღო. ისინი სტრასბურგის სასამართლოში ჩივილის ვერსიას განიხილავენ.
ვიდრე პრეზიდენტი კანონთა პაკეტს ვეტოს დაადებდა, პარლამენტის თავმჯდომარემ, ირაკლი კობახიძემ უკვე დააანონსა, რომ პარლამენტი ამ ვეტოს დაძლევდა. პრეზიდენტის ვეტოს დასაძლევად პარლამენტის 76 დეპუტატის ხმა არის საჭირო.
1 მარტს პარლამენტმა მესამე და საბოლოო მოსმენით განიხილა და 87 ხმით 2-ის წინააღმდეგ დაამტკიცა ფარული საგამოძიებო მოქმედებების შესახებ მომზადებული საკანონმდებლო ცვლილებების პაკეტი.
ცვლილებების მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი – საქართვლოს ოპერატიულ-ტექნიკური სააგენტო, რომლის ხელშიც იქნება ფარული მიყურადებისთვის საჭირო ე.წ. გასაღები. პროექტით, საჯარო სამართლის იურიდიული პირის – “საქართვლოს ოპერატიულ-ტექნიკური სააგენტოს” ხელმძღვანელი საკუთარ მოადგილეებს თვითონ დანიშნავს, ხოლო სააგენტოს დებულებას საქართველოს მთავრობა დაამტკიცებს.
- 1 მარტს პარლამენტმა მესამე და საბოლოო მოსმენით განიხილა და 87 ხმით 2-ის წინააღმდეგ დაამტკიცა ფარული საგამოძიებო მოქმედებების შესახებ მომზადებული საკანონმდებლო ცვლილებების პაკეტი.ცვლილებების მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი – საქართვლოს ოპერატიულ-ტექნიკური სააგენტო, რომლის ხელშიც იქნება ფარული მიყურადებისთვის საჭირო ე.წ. გასაღები. პროექტით, საჯარო სამართლის იურიდიული პირის – “საქართვლოს ოპერატიულ-ტექნიკური სააგენტოს” ხელმძღვანელი საკუთარ მოადგილეებს თვითონ დანიშნავს, ხოლო სააგენტოს დებულებას საქართველოს მთავრობა დაამტკიცებს.
- პარლამენტმა ფარული საგამოძიებო მოქმედებების შესახებ საკონმდებლო ცვლილებების პაკეტი იმიტომ მიიღო, რომ საკონსტიტუციო სასამართლომ 2016 წლის 14 აპრილს “ეს შენ გეხებას” სარჩელი დააკმაყოფილა და დაადგინა, რომ ფარული მოსმენების არსებული წესი არაკონსტიტუციურია. საკონსტიტუციო სასამართლომ სასამართლომ პარლამენტს კანონის შესაცვლელად ვადა 2017 წლის 31 მარტამდე მისცა.
- კამპანია “ეს შენ გეხება”, არასამთავრობო ორგანიზაციები და საპარლამენტო ოპოზიცია მიიჩნევენ, რომ ახალი კანონი “ფარული თვალთვალის” შესახებ, კვლავ არ შეესაბამება კონსტიტუციას.
