“ზვიად ნაზღაიძეს უსაფუძვლოდ გადაეცა ქონება” – აცხადებს  საია მას შემდეგ, რაც შეისწავლა დოკუმენტაცია რუსთავი 2-ის საქმის მოსამართლე ნატა ნაზღაიძის ძმისთვის გადაუდებელი საზოგადოებრივი საჭიროების სახელით ჩამორთმეულ და სიმბოლურ ფასად გადაცემულ ქონებასთან დაკავშირებით.

საქმე ეხება ზვიად ნაზღაიძისთვის სანდრო ეულის ქუჩაზე 5001 კვადრატული მეტრის ფართობის მიწის ნაკვეთისა და 455 800 ლარის თანხის გადაცემას, რაც მთლიანობაში 971 260 ლარს აღწევს, ყიფშიძის ქუჩაზე მდებარე 1642 კვადრატული მეტრის მიწის ნაკვეთის სანაცვლოდ, რომელიც 2015 წლის ვერეს სტიქიის დროს დაზიანდა.

20 მარტს საიას ამ კვლევის პრეზენტაციას ჟურნალისტები და საკრებულოს ოპოზიცია დაესწრნენ. საიას თავმჯდომარის, ანა ნაცვლიშვილის განცხადებით, მათ მოიწვიეს საკრებულოს უმრავლესობაც, თუმცა ისინი პრეზენტაციაზე არ მივიდნენ.

საკრებულოს ოპოზიცია უსმენს საიას კვლევის “28-ჯერ ძვირად ჩამორთმეული ქონება” ავტორის, სულხან სალაძის პრეზენტაციას. ფოტო: ნეტგაზეთი/ქეთი მაჭავარიანი 20.03.2017

საია პროკურატურას მოუწოდებს, ამ საქმით დაინტერესდეს, ვინაიდან, შესაძლოა, ეს ფაქტი საჯარო მოხელეების მხრიდან დანაშაულის ნიშნებს შეიცავდეს.

ამ საკითხთან დაკავშირებით დღეს, 20 მარტს მთავარმა პროკურორმა, ირაკლი შოთაძემ ჟურნალისტებთან საუბრისას განაცხადა, რომ ამ ფაქტზე “მიმდინარეობს ინფორმაციის მოგროვება” და სამართლებრვი გადაწყვეტილება ჯერ მიღებული არ არის.

სულხან სალაძე საიას კვლევის “28-ჯერ ძვირად ჩამორთმეული ქონება” პრეზენტირებისას. ფოტო: ნეტგაზეთი/ქეთი მაჭავარიანი 20.03.2017

საიას კვლევის თანახმად, დოკუმენტების შესწავლისას კანონთან რიგი შეუსაბამობები გამოიკვეთა, რაც მათ აფიქრებინებს, რომ ნაზღაიძისთვის ქონების ჩამორთმევისა და შემდგომ მისი გადაცემის ფაქტი, შესაძლოა, დანაშაულის ნიშნებს შეიცავდეს:

[checklist]

• 20155 წლის 13-14 ივნისის სტიქიის დროს ზვიად ნაზღაიძე არ წარმოადგენდა ყიფშიძის #2-ის მიმდებარედ არსებული 1641 კვ.მ უძრავი ქონების მესაკუთრეს და არც ოფციის უფლება გააჩნდა ქონებაზე;
• ყიფშიძის #2-ის მიმდებარედ არსებულ 1641 კვ.მ უძრავ ქონებაზე არ ვრცელდება 2015 წლის 13-14 ივნისს მომხდარი სტიქიის შედეგად დაზარალებულ პირთა (ოჯახთა) საცხოვრისით უზრუნველყოფის, უძრავი ქონების დათმობისა და სხვა სახის ფულადი დახმარების გაცემის წესის დამტკიცების შესახებ თბილისის საკრებულოს 2015 წლის 5 ივლისის #17-66 დადგენილების მოქმედება;
• ყიფშიძის #2-ის მიმდებარედ არსებული 1641 კვ.მ უძრავი ქონების ჩამორთმევის დროს უსაფუძვლოდ იქნა გამოყენებული საზოგადოებრივი საჭიროებისთვის გადაუდებელი აუცულებლობისას საკუთრების ჩამორთმევის წესის შესახებ საქართველოს ორგანული კანონი;
• არც ერთ სამართლებრივ აქტსა და ამ აქტებთან დაკავშირებულ ოფიციალურ დოკუმენტებში არ არის დასაბუთებული ზვიად ნაზღაიძისთვის ქონების ჩამორთმევისას  – საზოგადოებრივი საჭიროება და/ან გადაუდებელი აუცილებლობის არსებობა;
• ზვიად ნაზღაიძეს უსაფუძლოდ გადაეცა თბილისში, საბურთალოს საცხოვრებელ რაიონში, V კვარტალში, სანდრო ეულის #5-ში მდებარე 50001 კვ.მ. უძრავი ქონება.
• სავარაუდოა, რომ თბილისის მუნიციპალიტეტსა და ზვიად ნაზღაიძეს შორის არსებობდა წინასწარი შეთანხმება მუნიციპალიტეტის მიერ ნაზღაიძის მხრიდან ქონების შეძენის შემთხვევაში, მუნიციპლიტეტის მხროდან ქონების გარანტირებულად ჩამორთმევისა და საკომპენსაციოდ, 971 260 ლარის ( ნაწილობრივ უძრავი ქონების სახით) გარანტირებულად გადაცემის თაობაზე.

[/checklist]

რაც შეეხება იმ ფაქტს, თუ რამდენად შეიძლება იყოს კავშირები სააპელაციო სასამართლოში რუსთავი 2-ის საქმის განხილვასა და ამ საქმის მოსამართლის, ნატა ნაზღაიძის ძმისთვის ქონების გადაცემასთან დაკავშირებით, საია ამბობს, რომ პირდაპირი მტკიცებულებები არ აქვთ.

“რთულია პირდაპირ იმის მტკიცება, რომ ზვიად ნაზღაიძისთვის ქონების ჩამორთმევა და საკომპენსაციოდ  971 260 ლარის გადაცემა პირდაპირ კავშირშია ნატა ნაზღაიძის მიერ რუსთვი 2-ის საქმის განხილვასთან,”- აცხადებს საია, თუმცა კვლევაში საუბარია, რომ ქრონოლოგიურად, სააპელაციო სასამართლოში რუსთავი 2-ის საქმეზე პროცესი და ზვიად ნაზღაიძისთვის ქონების ჩამორთმევა და გადაცემა ერთმანეთს ემთხვევა:

მოვლენების განვითარების ქრონოლოგია სააპელაციო სასამართლოში რუსთავი 2-ის საქმისა და ზვიად ნაზღაიძისთვის ქონების გადაცემის საკითხზე საიას კვლევის მიხედვით.

[checklist]

• ნატა ნაზღაიძეს საქმე გადაეცა მას შემდეგ, რაც ქონების მართვის სააგენტომ ექსპერტიზის ბიუროს ყიფშიძის #2-ის მიმდებარედ არსებულ ქონებაზე დასკვნის მოსამზადებლად მიმართა;
• ექსპერტიზის დასკვნის მომზადებისა და მერიის მიერ ზვიად ნაზღაიძისთვის 971 260 ლარის გადაცემამდე სააპელაციო სასამართლოს მოსამართლე ნატა ნაზღაიძემ “რუსთავი 2”-ის საქმეზე გადაწყვეტილება მიიღო.

[/checklist]

საიას კვლევის “28-ჯერ ძვირად ჩამორთმეული ქონება” პრეზენტაცია. ფოტო: ნეტგაზეთი/ქეთი მაჭავარიანი 20.03.2017