“დაანებონ სიცრუეზე დაყრდნობილ ბრალდებებს თავი, რეალური საკრიტიკოც ბევრი გვექნება ჩვენ. არ არსებობს ხელისუფლება, რომ კრიტიკას არ იმსახურებდეს და ჩვენ ამის განწყობა გვაქვს. ჩემი მოწოდება იყო, რომ ისინი (საპარლამენტო უმცირესობა) დაბრუნდნენ რეალობაში, შეაფასონ ახალი რეალობა და არა სიცრუეზე დაყრდნობით მოახერხონ კრიტიკა, არამედ ობექტური კრიტიკა დაიწყონ, რომელიც იქნება კონსტრუქციული და სასარგებლო ჩვენი ქვეყნისთვის. რამდენჯერმე დავუსახელე მე მათ ჩვენი პროგრამის განხორციელების ვადები, თუმცა გამოსვლებში გამოდიან და იგივეს იმეორებენ. ამბობენ თავის დასკვნებს სიცრუეზე დაყრდნობით და მერე  იმაზე ანალიზებს აკეთებენ. თავი დაანებონ ამ სიყალბეს”, – აღნიშნა ივანიშვილმა.

აღნიშნული შეფასება პრემიერ მინისტრობის კანდიდატმა პარლამენტის სხდომაზე უმცირესობის წინაშე წარდგომის შემდეგ განაცხადა.

ივანიშვილის განმარტებით, მათ პროგრამაში არსებობს პროექტები, რომლის განხორციელების ზუსტი ვადებიც ჯერ ვერ დასახელდება.

“რამდენიმე შეკითხვა იყო და განვუმარტე, თუ სად  ვასახელებდით ჩვენ დროს, სადაც არ გვითქვამს დრო, იქ არ ვაპირებთ დაზუსებას. მათ კი ეს ვერ გაიგეს იმიტომ, რომ სხვა რეალობაში არიან. ჩემს პროგრამაში მუდმივად ვამბობდით, რომ პენსია უნდა იყოს არანაკლები საარსებო მინიმუმის და საარსებო მინიმუმიც უნდა გადაიხედოს. მაგრამ როდის მოხდება ეს, ჩვენ არ დაგვისახელებია კონკრეტული დრო. ამას სჭირდება ეკონომიკური პროცესების დაწყება, სამუშაო ადგილების შექმნა”, – განუცხადა ივანიშვილმა ჟურნალისტებს.