ახალი ამბები

ხოშტარია: საკონსტიტუციო კომისიის ლეგიტიმურობა უკიდურესად მნიშვნელოვანია

13 დეკემბერი, 2016 • 2583
ხოშტარია: საკონსტიტუციო კომისიის ლეგიტიმურობა უკიდურესად მნიშვნელოვანია

საპარლამენტო უმცირესობის წევრის, ელენე ხოშტარიას განცხადებით, საკონსტიტუციო კომისიის ლეგიტიმურობა უკიდურესად მნიშვნელოვანია.

“დღეს, როდესაც ქართულ ოცნებას აქვს საკონსტიტუციო უმრავლესობა,  კომისია კიდევ უფრო დიდ მნიშვნელობას იძენს. კომისიის ლეგიტიმურობა არის უკიდურესად მნიშვნელოვანი ჩვენი ქვეყნის განვითარებისათვის. ჩვენ ოთხი წელი ვუყურებდით “ქართული ოცნების” შიგნით კინკლაობას პრეზიდენტსა და მთავრობას შორის. ამ კინკლაობას ქვეყნის ბევრი ინტერესი შეეწირა, ქვეყნის გარეთ და შიგნით. ძალიან ცუდია, რაც ხდება, ის, რომ ასეთ ფუნდამენტურ საკითხზე ისევ ვართ ამ კინკლაობისბის რეჟიმში,” – განაცხადა ელენე ხოშტარიამ.

საქართველოს პრეზიდენტის ადმინისტრაციის უფროსის, გიორგი აბაშიშვილის განცხადებით, პრეზიდენტის ადმინისტრაცია არ ჩაერთვება საკონსტიტუციო კომისიის მუშაობაში.

“საქართველოს პარლამენტის მხრიდან შემოთავაზებული წინადადება საკონსტიტუციო კომისიის შექმნის წესის შესახებ, ვფიქრობთ, არაერთ კითხვის ნიშანს აჩენს. წარმოდგენილი დადგენილების პროექტი ცალსახად მოკლებულია პოლიტიკურ ნდობას და პოლიტიკურ ლეგიტიმაციას, საკითხთა განხილვის დემოკრატიულ წესს და არ არის ორიენტირებული ფართო კონსენსუსის მიღწევაზე. უფრო მეტიც, აქ მეტი აქცენტია ერთპიროვნული და ერთპარტიული გადაწყვეტილებების მიღებაზე. შესაბამისად, საქართველოს პრეზიდენტი და პრეზიდენტის წარმომადგენლები თავს შეიკავებენ საკონსტიტუციო კომისიაში მონაწილეობის მიღებისგან. თუმცა, ამავდროულად, მინდა ხაზგასმით აღვნიშნო, რომ ჩვენ აქტიურად ავამუშავებთ ამ თვალსაზრისით არსებულ ერთადერთ საკონსტიტუციო ნორმას – კონსტიტუციური ცვლილებების საყოველთაო, სახალხო განხილვას,”- განაცხადა გიორგი აბაშიშვილმა 12 დეკემბერს.

მიმდინარე კვირაში პარლამენტი სახელმწიფო საკონსტიტუციო კომისიის შექმნის შესახებ იმსჯელებს. შესაბამისი დადგენილების პროექტი პარლამენტის ბიურომ დღეს, 12 დეკემბერს დაარეგისტრირა.

დადგენილების პროექტის მიხედვით, კომისიის პერსონალურ შემადგენლობას პარლამენტის თავმჯდომარე დაამტკიცებს. კომისიის შემადგენლობაში შედიან: პარლამენტის თავმჯდომარე; ბოლო საპარლამენტო არჩევნებში დამოუკიდებლად მონაწილე იმ პარტიების და იმ ბლოკების პირველი ნომერი წარმომადგენლები, რომელთაც საარჩევნო ბარიერი გადალახეს; ასევე, იმ პარტიების თითო წარმომადგენელი, რომლებმაც ბარიერი ვერ გადალახეს, მაგრამ ხმების 3% მაინც მიიღეს;

კომისიაში, პროექტის თანახმად, ასევე უნდა ყოფილიყო პრეზიდენტის ორი წარმომადგენელი; მთავრობის ორი წარმომადგენელი; საკონსტიტუციო სასამართლოს თავმჯდომარე; უზენაესი სასამართლოს თავმჯდომარე; აჭარისა და აფხაზეთის ავტონომიური რესპუბლიკების წარმომადგენლობითი და აღმასრულებელი ორგანიზაციების ხელმძღვანელები; საქართველოს სახალხო დამცველი; ეროვნული ბანკის პრეზიდენტი; გენერალური აუდიტორი; უშიშროების საბჭოს მდივანი; ექსპერტები და არასამთავრობო ორგანიზაციების წარმომადგენლები.

დადგენილების პროექტის მიხედვით, ექსპერტებსა და არასამთავრობო ორგანიზაციების წარმომადგენლებს პარლამენტის თავმჯდომარე, ირაკლი კობახიძე განსაზღვრავს, თუმცა არაფერია ნათქვამი შერჩევის კრიტერიუმებზე.

დადგენილების თანახმად, “ქართულ ოცნებას” კომისიაში 23 წევრი ეყოლება, “ნაციონალურ მოძრაობას” – 6 წევრი; ხოლო “პატრიოტთა ალიანსს” – 1 წევრი.

მასალების გადაბეჭდვის წესი