საგარეჯოს მუნიციპალიტეტის ეთნიკური აზერბაიჯანელებით დასახლებული სოფლების – იორმუღანლოსა და კაზლარის საარჩევნო უბნების დიდ ნაწილში, დღეს, 2016 წლის 8 ოქტომბრის საპარლამენტო არჩევნების დროს, კომისიის წევრებსა და დამკვირვებლებს შორის პერიოდულად კამათი და სიტყვიერი დაპირისპირებაა იმის გამო, რომ საარჩევნო პროცესი აზერბაიჯანულ ენაზე მიმდინარეობს.

თითქმის ყველა საარჩევნო უბანზე კომისიის წევრები  ეთნიკური აზერბაიჯანელები არიან. შესაბამისად, კომისიის წევრებისა და ამომრჩევლის საუბარი ნებისმიერ საკითხზე ამავე ენაზე ხდება. პოლიტიკური პარტიების წარმომადგენლების უმეტესობა უბნებზე ქართულენოვანია.

დამკვირვებლები აცხადებენ, რომ ნებისმიერი რეპლიკა თუ კომენტარი, რომელსაც კომისიის წევრები თანასოფლელი ამომრჩევლების მისამართით იყენებენ, მათთვის გაუგებარია.

“დილით კომისიის წევრმა ამომჩეველს კაბინაში შესვლამდე აზერბაიჯანულად “41” ნომერი უკარნახა, მაგდენი აზერბაიჯანული კი გავიგე. შესაბამისად, როცა შენიშვნა მივეცი, კომისიის თავმჯდომარე გამოესარჩლა და მთელ უბანზე მიყვიროდა, რომ ვცდები და არანაირ დარღვევას ადგილი არ ჰქონია”, – ამბობს დამკვირვებელი “პატრიოტთა ალიანსიდან” ნეტგაზეთთან საუბარში.

კომისის თავმჯდომარე იმრან ველიევი კი აცხადებს, რომ “კომისიის წევრს არ უკარნახია ამომრჩევლისთვის არაფერი, მხოლოდ მიუთითა, რომ შესულიყო კაბინაში და რომელი კანდიდატიც სურდა, ის შემოეხაზა”.

მსგავს ფაქტებზე პოლიტიკური პარტიების წარმომადგენლებმა საჩივრები დაწერეს.

საგარეჯოს N23 საარჩევნო ოლქში მაჟორიტარულ არჩევნებში მონაწილეობენ “პატრიოტთა ალიანსიდან”- ირმა ინაშვილი, “ერთანი ნაციონალური მოძრაობიდან” -ზურაბ ჭიაბერაშვილი, “ქართული ოცნებიდან”- რომან მუჩიაშვილი, „პაატა ბურჭულაძე ‐ სახელმწიფო ხალხისთვის“- თორნიკე ჩუნთიშვილი, „ნინო ბურჯანაძე ‐ დემოკრატიული მოძრაობიდან“ – ალექსანდრე ჩაფიძე, „საქართველოს კომუნისტური პარტია ‐ სტალინელებიდან“- იური ყვარელაშვილი და საინიციატივო ჯგუფიდან- კაზანფარ მამედოვი.