“საერთაშორისო რესპუბლიკური ინსტიტუტის” (IRI) საქართველოს ოფისში აცხადებენ, რომ მათ მიერ ჩატარებული ბოლო კვლევის მედიარელიზს ვაშინგტონის ოფისი დაახლოებით ორ კვირაში გამოაქვეყნებს. მანამდე აღნიშნული ორგანიზაცია კვლევის შედეგებზე არანაირ ინფორმაციას არ ასაჯაროებს.
IRI-ში ამ ეტაპზე გაურბიან კვლევის მეთოდოლოგიაზე დეტალური ინფორმაციის გაცემას. ორგანიზაციაში აცხადებენ, რომ კვლევა GALLUP-მა ჩაატარა, გამოიკითხა საქართველოს მასშტაბით სოფლებსა და ქალაქებში მოსახლეობა პირისპირ ინტერვიუს გზით. სხვა დეტალებზე კვლევასთან დაკავშრებით IRI-ის საქართველოს ოფისში არ საუბრობენ.
კვლევის შედეგები, რომელიც IRI-ის დაკვეთით ორგანიზაცია GALLUP-მა განახორციელა მიმდინარე წლის მარტსა და აპრილში, მხოლოდ პოლიტიკური პარტიებისთვის გასაჯაროვდა, ხოლო აღნიშნულმა პარტიებმა კი ეს ინფორმაცია რამდენიმე მედიასაშუალებას მიაწოდეს.
სამაუწყებლო კომპანია “რუსთავი 2”-ის ცნობით, კვლევის ფარგლებში დასმულ შეკითხვაზე – შემდეგ კვირას რომ საპარლამენტო არჩევნები ტარდებოდეს, რომელ პარტიას მიცემდით ხმას? – 45%-მა “ნაციონალური მოძრაობა” დაასახელა, 15%-მა – “ქართული ოცნება”, 9%-მა – “ქრისტიან-დემოკრატიული მოძრაობა” და 4%-მა – სხვა პარტიები.
ამავე ტელეკომპანიის ცნობით, ოპოზიციონერ ლიდერებს შორის ყველაზე მეტი ადამიანი, გამოკითხულთა 28%, გიორგი თარგამაძეს ენდობა და 21% – ბიძინა ივანიშვილს.
IRI-ის კვლევის შედეგების ნაწილი გამოაქვეყნა სააგენტო “ინტერპრესნიუსმაც”. IPN-ის ცნობით, შეკითხვაზე – შემდეგ კვირას რომ ტარდებოდეს საპრეზიდენტო არჩევნები, რომელ კანდიდატს მისცემდით ხმას? – 37% მხარს უჭერს “ერთიანი ნაციონალური მოძრაობის” ვირტუალურ კანდიდატს, 19% – ბიძინა ივანიშვილს და 10% – გიორგი თარგამაძეს.
მმართველი პარტიისა და “ქრისტიან-დემოკრატებისთვის” IRI-ის კვლევის შედეგები მისაღებია, “ქართული ოცნება” კი აღნიშნული ორგანიზაციის, ისევე როგორც NDI-ის მიერ ჩატარებული კვლევის შედეგებს, არ ენდობა.
“ჩვენ ამ კვლევებს არ ვენდობით და არ მიგვინიჭებია მისთვის დიდი მნიშვნელობა”, – აცხადებს “ქართული ოცნების” პრეს-სპიკერი მაია ფანჯიკიძე.
NDI-ის მიერ თებერვალ-მარტში ჩატარებული კვლევის თანახმად, შეკითხვაზე – ხვალ რომ საპარლამენტო არჩევნები იყოს, რომელ პარტიას მისცემთ ხმას, გამოკითხულთა 47%-მა “ერთიანი ნაციონალური მოძრაობა” დაასახელა, ხოლო 10%-მა – “ქართული ოცნება”, 3%-მა კი – “ქრისტიან-დემოკრატიული მოძრაობა”.
ამავე NDI-ის კვლევის თანახმად, შეკითხვაზე – ხვალ რომ საპრეზიდენტო არჩევნები იყოს, ვის მისცემდით ხმას? – გამოკითხულთა 29%-მა “ერთიანი ნაციონალური მოძრაობის” ვირტუალური კანდიდატი დაასახელა, 12%-მა– ბიძინა ივანიშვილი, ხოლო 5%-მა– გიორგი თარგამაძე.
ამ ორი კვლევის მონაცემებს თუ შევადარებთ, გამოდის, რომ ერთი თვის შუალედში 6%-ით გაიზარდა “ქრისტიან-დემოკრატიული მოძრაობის” რეიტინგი, 5%-ით კი – “ქართული ოცნების” რეიტინგი. “ერთიანი ნაციონალური მოძრაობის” რეიტინგი შემცირდა 2%-ით.
რაც შეეხება ლიდერებს, “ერთიანი ნაციონალური მოძრაობის” ვირტუალური ლიდერის რეიტინგი გაზრდილია 8%-ით, ბიძინა ივანიშვილის რეიტინგი– 7%-ით, ხოლო 5%-ით – გიორგი თარგამაძის.
