“ნათელია, რომ თეს-ის მშენებლობა, ერთი მხრივ, არ ესადაგება საქართველოს ენერგოპოლიტიკის მიმართულებებს, ხოლო მეორე მხრივ, მკვეთრად ეწინააღმდეგება საქართველოს მიერ გაერო-ს კლიმატის ცვლილების შესახებ კონვენციის მხარეთა წინაშე აღებულ ვალდებულებებს და ასევე, საფრთხეს უქმნის საქართველო-ევროკავშირის სამოქმედო გეგმის წარმატებულ განხორციელებას,” – ნათქვამია ასოციაცია მწვანე ალტერნატივას, საქართველოს სამოქალაქო საზოგადოების განვითარების ასოციაციის და ქუთაისის საინფორმაციო ცენტრის “ქ. ტყიბულში 300 მვტ სიმძლავრის თბოელექტროსადგურის მშენებლობის და ექსპლუატაციის პროექტის” შენიშვნებში.

საქართველოს მწვანეთა მოძრაობის დედამიწის მეგობრობის თანათავმჯდომარე ნინო ჩხობაძე ამბობს, რომ „ყველაზე დიდი უპირატესობა თბოელექტროსადგურებში ენიჭება ბუნებრივ აირს, ვინაიდან წვიდან გამომდინარე ნაკლებ ემისიას აფრქვევს ჰაერში. საერთოდ კი, უსაფრთხოების თვალსაზრისით, რიგითობა ასეთია: ჰელიო, ჰიდრო, თბო და ატომური ელექტროსადგურები. რაც შეეხება თბოელექტროსადგურებს, ბუნებრივ აირზე და ნავთობპროდუქტებზე მომუშავე თბოელექტროსადგური ქვანახშირზე მომუშავე ელექტროსადგურზე ნაკლებ უსაფრთხოა,”-ამბობს ჩხობაძე.

გარდა ამისა, ჩხობაძე განმარტავს, რომ ტყიბულის ქვანახშირი დიდი ნაცრიანობით გამოირჩევა.

“დიდი რაოდენობით დარჩება ნაცარი. რა უნდა ვუყოთ ამ დიდი რაოდენობის ნაცარს? ნებისმიერ შემთხვევაში აუცილებლად დათვლილი უნდა იყოს, სად წავა ნარჩენი, რა ტიპის გამონაბოლქვს გამოუშვებს, რა ფილტრები დაიდგმება. ყოველივე ამის შემდეგ უფრო კონკრეტულად იქნება შესაძლებელი, საფრთხეებზე ვისაუბროთ,” – ამბობს ჩხობაძე.

საქართველოს გარემოს დაცვის სამინისტროს ჰიდრომეტეოროლოგიური და კლიმატის ცვლილების სამმართველოს უფროსი გრიგოლ ლაზრიევიც აღნიშნავს, რომ მსოფლიოს განვითარებულ ქვეყნებში თბოელექტროსადგურების შემცირების ტენდენციაა, თუმცა აქვე ამბობს, რომ  „ქვანახშირი არის ჩვენი საკუთარი ნედლეული, სხვა ნედლეული, სამწუხაროდ, არ გაგვაჩნია, იძულებულები ვართ, ენერგოუსაფრთხოების გაზრდის მიზნით ავაშენოთ საბაზისო ელექტროსადგურები, ვინაიდან ბუნებრივი აირი და ნავთობპროდუქტები არ გაგვაჩნია და მხოლოდ ნახშირი გვაქვს. რაც შეეხება კონკრეტულად ახალი თბოელექტროსადგურის მშენებლობას, გარემოზე ზემოქმედების შეფასება იქნება აუცილებლად, რომელიც აჩვენებს, იქნება თუ არა ეკოლოგიური საფრთხეები.”