“გარემოსა და ბუნებრივი რესურსების დაცვის სამინისტროსა და „საქართველოს მეთევზეთა კლუბის“ ერთობლივი ღონისძიება – ზიკას ვირუსის გამავრცელებელი კოღოს გასანადგურებლად თბილისში და მის ახლოს არსებულ ტბორებში გამბუზიის სახეობის თევზი გაუშვეს”.

როგორც გარემოს დაცვის სამინისტროს მიერ გავრცელებულ ინფორმაციაშია ნათქვამი, ამ ჯიშის თევზმა უკვე გაანდგურა კოლხეთის დაბლობში მალარიის კოღო, ახლა კი მთელს ევროპაში მას მასიურად ამრავლებენ და უშვებენ ყველა შესაძლო ტბორში.

“სამინისტროსა და “საქართველოს მეთევზეთა კლუბს“ შორის გაფორმებული მემორანდუმის ფარგლებში კლუბის წევრებმა გამბუზია დასავლეთ საქართველოდან, კერძოდ კი, აბაშიდან გადმოასახლეს და კუს ტბაში ჩაუშვეს”, – აცხადებენ სამინისტროში.

მსოფლიო ჯანდაცვის ორგანიზაციის (WHO) მიერ ჯერ კიდევ გაზაფხულს გავრცელებული ინფორმაციით, გაზაფხულის ბოლოს და ზაფხულის დასაწყისში ევროპა ახალი რისკების წინაშე დადგება ზიკა ვირუსთან დაკავშირებით. ვირუსის გავრცელების რისკები რეგიონების მიხედვით იცვლება და მსოფლიო ჯანდაცვის ორგანიზაციის მიხედვით, მაღალი რისკის მქონდე რეგიონში საქართველოც მოხვდა.

მსოფლიო ჯანდაცვის ორგანიზაციის ცნობით, დაავადების გადამტანი მწერების გავრცელების არეალში შავი ზღვის ჩრდილო-აღმოსავლეთ სანაპირო მოხვდა. მათ შორის, რუსეთის აღმოსავლეთ ნაწილი და საქართველოც. მსოფლიო ჯანდაცვის ორგანიზაციის ცნობით, მწერები ხმელთაშუა ზღვის აუზის ქვეყნებში არიან გავრცელებულნი და მათი გავრცელების არეალს ალბანეთი, ბოსნია ჰერცოგოვინა, ბულგარეთი, ხორვატია, საფრანგეთი, გერმანია, საქართველო, საბერძნეთი, ისრაელი, იტალია, მალტა, მონაკო, მონტენეგრო, რუმინეთი, სან მარინო, სლოვენია, ესპანეთი, შვეიცარია, თურქეთი და ვატიკანი წარმოადგენს.

ადამაინებს ზიკა ვირუსი Aedes–ის გვარის ინფიცირებული კოღოების კბენის შედეგად გადაეცემათ. ამ ტიპის კოღოები ასევე ავრცელებენ სხვადასხვა ვირუსს, მათ შორის, ყვითელ ცხელებას. ვირუსი Aedes ოჯახის მწერების რამდენიმე სახეობას გადააქვს, მათ შორის A. aegypti, რომელმაც ამერიკის კონტინენტზე დაავადების გავრცელება გამოიწვია. მეორე სახეობაა აზიის ჩრდილო-აღმოსავლეთში გავრცელებული A. albopictus, რომლის ევროპაში გავრცელების რისკიც არსებობს.

მსოფლიო ჯანდაცვის ორგანიზაცია ეპიდემიის თავიდან ასაცილებლად შესაბამისი ზომების მიღებისკენ მოუწოდებს.

ვირუსის მატარებელი მწერის ნაკბენი ფეხმძიმე ქალებში ნაყოფის ანომალიას იწვევს. ახალშობილები მიკროცეფალიით იბადებიან. მიკროცეფალიას იწვევს ტვინის პათოლოგიური განვითარება მუცლად ყოფნის დროს ან ბავშვობის ეტაპზე. ერთი წლის განმავლობაში მხოლოდ ბრაზილიაში მსგავსი 1168 შემთხვევა დაფიქსირდა.