მარგველაშვილმა ეროვნული ბანკის პრეზიდენტად კობა გვენეტაძე დანიშნა

17 მარტს საქართველოს პრეზიდენტმა ხელი მოაწერა განკარგულებას კობა გვენეტაძის საქართველოს ეროვნული ბანკის პრეზიდენტად დანიშვნის შესახებ.

„მე დავამტკიცე გვენეტაძის კანდიდატურა ეროვნული ბანკის პრეზიდენტად და  მიმაჩნია, რომ ასეთი მაღალი რანგის პროფესიონალი ნამდვილად გამოადგება საქართველოს ეროვნულ ბანკს და იმ პოზიტიურ პროცესებს, რომლის იმედიც გვაქვს ჩვენი ქვეყნის ეკონომიკაში“, -განუცხადა საქართველოს პრეზიდენტმა ჟურნალისტებს კობა გვენეტაძესთან შეხვედრის შემდეგ.

გიორგი მარგველაშვილის განცხადებით, მმართველ კოალიციასთან აქტიური თანამშრომლობით კობა გვენეტაძემ მოიპოვა ხმები პარლამენტში, ბოლოს კი ეროვნული ბანკის პრეზიდენტობის კანდიდატად ეროვნული ბანკის საბჭომ წარმოადგინა.

ეროვნული ბანკის საბჭომ კობა გვენეტაძის კანდიდატურა საქართველოს პრეზიდენტს საქართველოს ეროვნული ბანკის პრეზიდენტის თანამდებობაზე დასანიშნად 16 მარტს წარუდგინა.

2 მარტს საქართველოს პარლამენტმა ეროვნული ბანკის საბჭოს წევრად საქართველოს პრეზიდენტის მიერ წარდგენილი კანდიდატი კობა გვენეტაძე ერთხმად დაამტკიცა.

საქართველოს ეროვნული ბანკის პრეზიდენტობის კანდიდატი, კობა გვენეტაძე 2015 წლის ნოემბრიდან კომპანია Galt and Taggart-ის (საქართველოს ბანკის შვილობილი კომპანია) ეკონომიკურ საკითხებში მრჩევლად მუშაობდა, ხოლო 2002-2015 წლებში მას ეკავა უფროსი ეკონომისტის თანამდებობა საერთაშორისო სავალუტო ფონდის შუა აღმოსავლეთისა და ცენტრალური აზიის დეპარტამენტში,  ვაშინგტონში.

კობა გვენეტაძე 2001-2002 წლებში იკავებდა საქართველოს  სახელმწიფო მინისტრის მოადგილის თანამდებობას,  ხოლო 2000-2001 წლებში იყო ფინანსთა მინისტრის მოადგილე.

1996-1998 წლებში, იგი ასევე იყო საქართველოში საერთაშორისო სავალუტო ფონდის მუდმივი წარმომადგენლობის ეკონომისტი, ხოლო 1994-1996 წლებში კი საქართველოს ეროვნულ ბანკში ეკავა მთავარი ეკონომისტის თანამდებობა.

კობა გვენეტაძეს მიღებული აქვს ეკონომიკის მაგისტრის აკადემიური ხარისხი ამერიკის უნივერსიტეტში, ვაშინგტონში, და იყო აშშ-ის მთავრობის ედმუნდ მასკის სამაგისტრო პროგრამის სტიპენდიანტი. 1989-1994 წლებში მან მოიპოვა ფინანსებისა და საკრედიტო სფეროს ბაკალავრის ხარისხი თბილისის სახელმწიფო უნივერსიტეტში.

 

ნეტგაზეთის მასალების სხვა გამოცემებში გადაბეჭდვის წესი
ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com