დღეს, 12 თებერვალს, საქართველოს მთავრობის კანცელარიასთან გაიმართა აქცია, სახელწოდებით “მინდა ვიცოცხლო!”. აქცია ორგანიზაციის “კავშირი სიცოცხლისთვის” ორგანიზებით ჩატარდა.
აქციის მონაწილეების მთავარი მოთხოვნა ონკოპაციენტების მკურნალობისთვის სახელმწიფოს ბიუჯეტიდან წლიურად გამოყოფილი 25000-ლარიანი ლიმიტის მოხსნა და მკურნალობის სრული დაფინანსებაა.
ორგანიზაციის “კავშირი სიცოცხლისთვის” დამფუძნებელი გვანცა აფხაიძე ამბობს, რომ აქციის მთავარი მიზანია, ახალ პრემიერს მიმართონ პირველივე სამუშაო დღეს შესაბამისი ჯგუფის შექმნასთან დაკავშირებით, რომელიც გამოასწორებს ხარვეზებს და მისცემს ონკოპაციენტებს დროული და ეფექტური მკურნალობის მიღების შესაძლებლობას.
“ჩვენ 2023 წელს მივიღეთ დაპირება, რომ ქვეყანაში ყველა ონკოპაციენტი შეძლებდა სრულფასოვან მკურნალობას. მაგრამ 2024 წლიდან ჩვენ დავდექით აბსოლუტურად სხვა რეალობის წინაშე – განისაზღვრა ჩვენს სიცოცხლეზე ლიმიტი 25 000 ლარის ოდენობით, რაც ხშირ შემთხვევაში არ არის საკმარისი. ჩვენ ვითხოვთ ამ ლიმიტის მოხსნას და პაციენტების ინდივიდუალურად დაფინანსებას სრულად. ასევე პრობლემაა დაფინანსება, რომელიც მუდმივად აგვიანებს და დაგვიანება ონკოპაციენტებისთვის, შესაძლოა, სამი დღითაც კი სასიცოცხლოდ მნიშვნელოვანი იყოს. ვითხოვთ, რომ ჯანდაცვის უწყებამ დროულად მიაწოდოს ეს სერვისი ონკოპაციენტებს, რათა მათ არ მოუწიოთ კარდაკარ სიარული”, – ამბობს გვანცა აფხაიძე.
ორგანიზაციის “კავშირი სიცოცხლისთვის” დამფუძნებელმა ისაუბრა პრეპარატების დეფიციტზე, დიაგნოსტირებისა და პრევენციის არარსებობაზე.
“არის წამლების დეფიციტი, რაც დღესაც პრობლემაა. ის პრეპარატებიც, რომლებსაც სახელმწიფო დაგვპირდა, რომ თვითონ უზრუნველყოფდა პირდაპირი შესყიდვით, დღეს არ იშოვება საქართველოში. მეორე თვეა ეს პრეპარატები დეფიციტშია და ეს ადამიანები ვერ ახერხებენ მკურნალობას. ასევე მნიშვნელოვანია ის, რომ დიაგნოსტირება და პრევენცია არ ხდება დღეს საქართველოში”.
“ვითხოვთ, რომ შეიქმნას სამუშაო ჯგუფი. ზუსტად ამისთვის ვართ დღეს შეკრებილი, რომ პრემიერს პირველივე სამუშაო დღეს მივმართოთ და ვთხოვოთ, რომ მისი მეთვალყურეობის ქვეშ შეიქმნას სამუშაო ჯგუფი, რომელიც გამოასწორებს ჯანდაცვის ხარვეზებს და დროულად და ეფექტურად მიიღებენ მკურნალობას ონკოპაციენტები”, – აღნიშნა ორგანიზაციის “კავშირი სიცოცხლისთვის” დამფუძნებელმა გვანცა აფხაიძემ.
“წელიწადში 25 000 ლარი ზოგიერთისთვის ორი-სამი პროცედურისთვის ან ორი-სამი თვისთვის არის საკმარისი. თვითონ წამლები უფასო კი არ არის, ამავე თანხას აკლდება – საფასური ამ 25 000 ლარიდან იფარება. პრობლემა არის ისიც, რომ მხოლოდ 13 დასახელების წამალი შედის და არსებობენ ადამიანები, ვინც სხვა წამლებით მკურნალობენ, რომლებიც არ ფინანსდება და საქართველოში რეგისტრირებულიც კი არ არის. სწორედ ამიტომ, წამლები მუდმივად დეფიციტშია, შემოტანა აგვიანდება და უწევთ ვინმეს მორჩენილის, ან სულაც შავ ბაზარზე ყიდვა”, – ამბობს აქციის ერთ-ერთი მონაწილე სალომე ბარკერ ნიკოლეიშვილი.
აქციის დასასრულს ორგანიზაციის “ კავშირი სიცოცხლისთვის” დამფუძნებელმა გვანცა აფხაიძემ განცხადება მთავრობის კანცელარიაში შეიტანა, რომლის განხილვაც 10 დღის ვადაში დაიწყება.
