ბაღდათში, სოფელ ნერგეეთში ჩამოწოლილი მეწყრის ადგილზე, მე-9 ადამიანის ცხედარი იპოვეს.
როგორც ნეტგაზეთს საგანგებო სიტუაციების სამსახურში განუცხადეს, ეს იმას ნიშნავს, რომ ამ დროისთვის ყველა ადამიანის ცხედარი ნაპოვნია.
მეწყერი ნერგეეთში 7 თებერვალს, დაახლოებით 02:00 საათზე ჩამოწვა და 4 საცხოვრებელი სახლი მოიყოლა. მას შემდეგ მეწყერში მოყოლილთა ძებნა უწყვეტად გრძელდებოდა. მეწყრის ჩამოწოლას წინ ძლიერი წვიმა უძღოდა.
დაღუპულთა შორის არიან ერთი ოჯახის წევრები: მამა და მისი სამი შვილი, დედა-შვილი და ბავშვის ბებია, ასევე, შუახნის ცოლ-ქმარი.
გარემოს ეროვნული სააგენტოს ცნობით, 7 თებერვალს მდ. ხანისწყლის ხეობის მარჯვენა ფერდობზე კლდეზვავური ტიპის მეწყრული პროცესი გააქტიურდა. უწყების განცხადებით, მეწყერი განვითარდა ფერდობის ქვედა ნაწილში, ძლიერ ციცაბოდ დახრილ ზედაპირზე (60-650), ფერდობის ამგებ ძლიერ გამოფიტულ ტუფქვიშაქვებში, ტუფებში და არგილეტებში (ზეკარის წყება).
სააგენტოს განცხადებით, მეწყრული მოწყვეტის ფლატის სიმაღლე 30 მეტრია, მეწყრის სიგანე ზედა ნაწილში 20-25-მ-ია, ხოლო ქვედა ნაწილში- 90-100 მ. დინამიკაში მოსული მეწყრული მასის საორიენტაციო მოცულობა შეადგენს 150 000 მ3-ს.
6-7 თებერვლის სტიქიის შედეგად მეწყერი და ზვავი ჩამოწვა აჭარაში, რასაც ასევე 2 ადამიანი ემსხვერპლა, დაზიანდა სახლები. უხვი ნალექის გამო დაიტბორა სამეგრელოსა და იმერეთის არაერთი დასახლება.
