გამოსახლების საწინააღმდეგო აქციაზე სისხლის სამართლის საქმეზე დაკავებულები არიან მოძრაობა „ხმის“ აქტივისტები, გიორგი ხასაია და კაკო ჩიქობავა. ინფორმაციას ამის შესახებ ორგანიზაცია თავად ავრცელებს:
„სხვა დაკავებულებისგან განსხვავებით, პოლიცია მათ სისხლის სამართლის დანაშაულის ჩადენას ედავება- კერძოდ, აღსრულების პოლიციის ფანჯრის ჩამსხვრევას – და მათ მიმართ 3-დან 6 წლამდე პატიმრობით იმუქრება. გიორგი და კაკო ჩვენი მოძრაობის თანადამფუძნებლები არიან. კაკო თბილისის სახელმწიფო უნივერსიტეტში საქართველოს ისტორიას ასწავლის. გიორგი ილიას სახელმწიფო უნივერსიტეტის ანთროპოლოგიის დოქტორანტია.
ჩვენ, მოძრაობა ხმა, განცხადებების გავრცელებით არ შემოვიფარგლებით, თუ ჩვენი ორივე წევრი არ გათავისუფლდება და მათ მიმართ დევნა არ შეწყდება. ისეთ ადგილებში დაგარტყამთ, სადაც ჯერ არ მოგხვედრიათ“, — ნათქვამია მოძრაობა „ხმის“ მიერ გავრცელებულ განცხადებაში.
უწყების ცნობით, 18 პირი პოლიციელის კანონიერი მოთხოვნის დაუმორჩილებლობისა და საზოგადოებრივი წესრიგის დარღვევის ფაქტებზე ადმინისტრაციული წესით დააკავეს, ორი კი- სისხლის სამართლის კოდექსის 187-ე მუხლის მე-2 ნაწილის „გ“ ქვეპუნქტით მიმდინარე გამოძიების ფარგლებში აღსრულების ეროვნული ბიუროს კუთვნილი ავტომობილის დაზიანების ფაქტზე.
მთავარი ფოტო: 2023 წლის 1 მაისის აქციიდან
