CRRC-ის ახალი გამოკითხვის თანახმად, საქართველოში გამოკითხულთა დაახლოებით 30% ვერ ასახელებს მიზეზს, თუ რატომ ვერ მიიღო ქვეყანამ ევროკავშირის კანდიდატის სტატუსი.

კვლევის ფარგლებში 1244 რესპონდენტი გამოიკითხა სატელეფონო ინტერვიუების სახით 20-დან 30 ივლისის პერიოდში. ცდომილება 2.8-დან 4.7%-მდეა.

გამოკითხვის თანახმად, 24%-მა არ იცის, რომ საქართველომ, მოლდოვისა და უკრაინისგან განსხვავებით, ვერ მიიღო ევროკავშირის კანდიდატის სტატუსი.

მათმა 30%-მა, ვინც იცის, რომ საქართველომ კანდიდატის სტატუსი ვერ მიიღო, თქვა, რომ არ იცის, რის გამო არ მიენიჭა საქართველოს კანდიდატის სტატუსი. დანარჩენი პასუხები ასე გადანაწილდა:

• 17%-ს მიაჩნია, რომ ამის მიზეზი მთავრობის უმოქმედობაა;
• 14%-ს ამის მიზეზად პოლარიზაცია მიაჩნია;
• 14%-ს – ქვეყნის მიერ წევრობის კრიტერიუმების შეუსრულებლობა,
• 8%-ს – ოპოზიციის მიერ ხელშეშლა,
• 3%-ს კი რუსეთის პოზიცია საქართველოს მიმართ;
• 4%-ს მიაჩნია, რომ ამის მიზეზი ისაა, რომ საქართველო ომში არ ჩაერთო/მეორე ფრონტი არ გახსნა.
• თითო-თითო პროცენტს ამის მიზეზად მიაჩნია „ოცნების“ მიერ შარლ მიშელის შეთანხმების პირობების შეუსრულებლობა, სააკაშვილის დაპატიმრება და ივანიშვილის არაფორმალური მმართველობა;

ამასთან, გამოკითხის თანახმად, მოსახლეობის 17%-ს სჯერა, რომ საქართველოს კანდიდატის სტატუსი მიენიჭებოდა, „მეორე ფრონტი რომ გაეხსნა“ რუსეთის ფედერაციასთან. ეს სიცრუედ მიაჩნია 59%-ს, 24% კი ამბობს, რომ არ იცის ამ საკითხზე პასუხი, ან არ პასუხობს კითხვას.

[ნახეთ ვრცლად: “ომში გვითრევენ…” – „ოცნების“ პროპაგანდის „2 მიზანი“]

კითხვაზე, აქვთ თუ არა მოლოდინი, რომ საქართველოს მთავრობა განახორციელებს კანდიდატობისთვის საჭირო რეფორმებს, პასუხები ასე გადანწილდა: 16%-ს საერთოდ არ სჯერა, 29% უფრო მეტად არ ელის, ვიდრე ელის, 25% უფრო მოელის ამ რეფორმებს, ვიდრე არა, ხოლო სრულიად დარწმუბული „ოცნებისეულ“ რეფორმებში 4%-ია. 25%-ი ამბობს, რომ ამ კითხვაზე პასუხი არ იცის.

კითხვაზე, ვინ შეიძლება იგულისხმებოდეს „დეოლიგარქიზაციაში“, 35% ასახელებს ბიძინა ივანიშვილი, 3-3 პროცენტი ასახელებს მიხეილ სააკაშვილსა და დავით კეზერაშვილს, 2-2% ასახელებს ვანო ჩხარტიშვილსა და მამუკა ხაზარაძეს, 52% კი ამბობს, რომ არ იცის.

[შენიშვნა: რიცხვების ჯამი ზოგ შემთხვევაში ზუსტად არ არის 100%, რაც მკვლევრების მიერ მონაცემების დამგვალებითაა გამოწვეული].