„ერთიანი ნაციონალური მოძრაობა“ უარყოფს, რომ ყოფილი პრეზიდენტი გიორგი მარგველაშვილი პარტიის თავმჯდომარე ხდება.
როგორც „ნეტგაზეთს“ პარტიის პრესსამსახურში განუცხადეს, მედიაში გავრცელებული ინფორმაცია სისულელეა და სიმართლეს არ შეესაბამება.
„რუსთავი 2“-ის მიერ გავრცელებულ ინფორმაციას Facebook-ზე გამოეხმაურა ენმ-ის ერთ-ერთი ლიდერი ლევან ხაბეიშვილი.
„ევტუშენკოვი-ბორინკას ჩანაწერების “გადაფარვის” იაფფასიანი მცდელობა სახელისუფლებო მედიაზე დაყრდნობით. ტყუილია და ნუ აყვებით სახელისუფლებო/სუსის პროპაგანდას“, — წერს ხაბეიშვილი.
„რუსთავი 2“-მა გაავრცელა ინფორმაცია, რომ საქართველოს მეოთხე პრეზიდენტი გიორგი მარგველაშვილი “ერთიანი ნაციონალური მოძრაობის” თავმჯდომარე ხდება. ტელეკომპანიის ცნობით, შეთავაზება მარგველაშვილმა პირადად მიხეილ სააკაშვილისგან მიიღო და ამ საკითხზე პარტიაში გადაწყვეტილება უკვე მიღებულია.
