მოსამართლე დავით წერეთლის გადაწყვეტილებით, 18 ნოემბერს გარემოს დაცვის სამინისტროსთან დაკავებული 6 აქტივისტი სრულად გამართლდა.

ორი აქტივისტი, გელა ქეთელაური და ოთარ ლობჯანიძე, მოსამართლემ ადმინისტრაციული სამართალდარღვევათა კოდექსის 173-ე მუხლის დამრღვევად ცნო, თუმცა სანქციის სახედ მხოლოდ სიტყვიერი შენიშვნა გამოიყენა. ეს მუხლი პოლიციელის კანონიერი მოთხოვნისადმი დაუმორჩილებლობას გულისხმობს.

ვარლამ გოლეთიანი © სალომე სიმონია

დღეს, 29 ნოემბერს, თბილისის საქალაქო სასამართლოში სრულად გამართლდნენ შემდეგი ადამიანები: რატი რატიანი, გიორგი ჟამურელი, დავით გოგრიჭიანი, ვარლამ გოლეთიანი, გელა გოგრიჭიანი, გალაქტიონ გოგრიჭიანი.

29 ნოემბერს სასამართლომ განიხილა  8 დაკავებული აქტივისტის საქმე. 3 აქტივისტის შესახებ სასამართლო, 30 ნოემბერს იმსჯელებს.

რატი რატიანი “მაუწყებლის” ჟურნალისტია.

თბილისში, გარემოს დაცვის სამინისტროსთან მიმდინარე საპროტესტო აქციაზე 18 ნოემბერს პოლიციამ არაერთი მომიტინგე დააკავა.

პოლიცია დაუპირისპირდა რაჭის პროტესტის მონაწილეებს, რომლებიც თბილისში, მარშალ გელოვანის გამზირზე, გარემოს დაცვისა და სოფლის მეურნეობის სამინისტროსთან კარვის გაშლას ცდილობდნენ.

დაპირისპირება აქციის მონაწილეებსა და პოლიციას შორის მას შემდეგ დაიწყო, რაც ცნობილი გახდა, რომ ამბროლაურიდან ჩამოსულ მომიტინგეებს სამართალდამცველები არ აძლევდნენ სამინისტროს ეზოში შესვლისა და კარვის გაშლის უფლებას.