შესაძლოა, რუსეთში BBC აკრძალონ

უახლოეს მომავალში, შესაძლოა, რუსეთში ბრიტანეთის საზოგადოებრივი მაუწყებელი  (BBC) აკრძალონ. სამართლებრივი პროცესი მსოფლიოს ერთ-ერთი წამყვანი ტელეარხის ასაკრძალად უკვე დაიწყო კომუნიკაციების მარეგულირებელმა ორგანომ “როსკომნადზორმა”.

როგორც BBC იტყობინება, “როსკომნადზორი” ტელეარხს “ტერორისტული ორგანიზაციის იდეოლოგიის” გავრცელებაში ადანაშაულებს. საუბარია ტერორისტული ორგანზიაცია ისლამური სახელმწიფოს ლიდერის, აბუბაქრ ალ-ბაღდადის ციტატაზე, რომელიც ახალ ამბებშია გამოყენებული.

როგორც რუსეთის სამთავრობო მედიასაშუალება RIA წერს, რუსეთში აკრძალულია ტერორისტული ორგანიზაციები და მათი იდეოლოგიის გავრცელება.

“როსკომნადზორმა” BBC-ის მოსთხოვა დოკუმენტაციის წარმოდგენა იმის დასადასტურებლად, რომ მისი საქმიანობა შეესაბამება რუსულ კანონმდებლობას. რუსული მარეგულირებელი ამის დადგენას დამოუკიდებლადაც შეეცდება – ის 14-დან 31 დეკემბრამდე დააკვირდება ბრიტანული მაუწყებლის მუშაობას.

BBC-ის განცხადებით, რუსეთის მარეგულირებლის ქმედებებს წინ უძღოდა ბრიტანული მარეგულირებლის მიერ 2018 წლის დეკემბერში რუსეთის სახელისუფლებო ტელეარხ RT-ის (Russia Today) კრიტიკა. კერძოდ, როდესაც ბრიტანეთში მამა-შვილ სკრიპალების “ნოვიჩოკით” მოწამვლაში ბრიტანული გამოძიება რუსულ კვალს ეძებდა, RT მოვლენებს დამახინჯებით აშუქებდა.

“BBC-სთან დაკავშირებული გადაწყვეტილება დიდი ხნის წინ მომწიფდა” – ასე შეაფასა “როსკომნადზორის” ქმედება  რუსეთის საგარეო საქმეთა სამინისტროს წარმომადგენელმა მარია ზახაროვამ. მისი კომენტარი RIA-მ გაავრცელა.

BBC როგორც ამბობს, მისი საქმიანობა შეესაბამება ყველა ქვეყნის კანონმდებლობას.

“ანტიექსტრემისტულ კანონმდებლობას” რუსეთში ხშირად იყენებენ სამოქალაქო აქტივისტებისა და მედიის თავისუფლების შესაზღუდად.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.