საზოგადოებრივი მაუწყებელი ბერას კომპანიას 400 ათასამდე ლარს უხდის

საზოგადოებრივი მაუწყებელი, რომელიც საქართველოს ბიუჯეტიდან ფინანსდება, ყოფილი პრემიერის – ბიძინა ივანიშვილის შვილის, ბერა ივანიშვილის კომპანიას ორი სხვადასხვა ტენდერის გზით 372 011 ლარს უხდის.

23 ოქტომბერს დასრულებული ტენდერის მიხედვით, საზოგადოებრივი მაუწყებელი ბერა ივანიშვილის კომპანიისგან 346 098 ლარად იქირავებს განათებას. მაუწყებელს განათება სჭირდება გადაცემისთვის “აქტუალური თემა 1 არხზე მაკა ცინცაძესთან ერთად”.

მაკა ცინცაძე საზოგადოებრივ მაუწყებელში მუშაობამდე იყო GDS-ის წამყვანი, რომელიც ივანიშვილის საკუთრებაა. ივანიშვილის გადაცემა 20/30-ის ყოფილმა პროდიუსერმა ვასილ მაღლაფერიძემ, მას შემდეგ, რაც საზოგადოებრივი მაუწყებლის გენერალური დირექტორი გახდა, ცინცაძე GDS-ის სხვა 30 ჟურნალისტთან ერთად დაასაქმა.

საზოგადოებრივი მაუწყებელი ცინცაძის გადაცემისთვის განათებას 9 თვით იქირავებს, ტენდერი ბერა ივანიშვილის კომპანია “სილქ ფაქტორი სტუდიომ” მოიგო და ამჟამად მიმდინარეობს ხელშეკრულების მომზადება.

სატენდერო პირობების მიხედვით, 2017 წელს გადასახდელი სავარაუდო თანხაა 76 910 ლარი, ხოლო 2018 წელს გადასახდელი სავარაუდო თანხა განისაზღვრება 269 188 ლარით.

“სილქ ფაქტორი სტუდიოს” 100%-იანი წილის მფლობელი მმართველი პარტიის დამფუძნებლის და ყოფილი პრემიერმინისტრის, ბიძინა ივანიშვილის შვილი ბერა ივანიშვილია, ხოლო კომპანიის დირექტორი- რეჟისორი გოგა ხაინდრავა, რომელმაც ივანიშვილის GDS-ის დაკვეთით მიხეილ სააკაშვილის შესახებ ფილმი “ჰეროკრატია” გადაიღო. კომპანია”სილქ ფაქტორი სტუდიო” 2017 წლის 15 თებერვალსაა დაფუძნებული.

საზოგადოებრივმა მაუწყებელმა ამ კომპანიასთან სექტენბერში კიდევ ერთი კონტრაქტი გააფორმა, რომელიც გულისხმობს გენერატორით, ძალოვანი კაბელითა და დენის გამანაწილებლის ქირაობას 25 913 ლარად.

აღნიშნული ხელშეკრულების მიხედვით, ეს ტექნიკა საზოგადოებრივ მაუწყებელს ადგილობრივი თვითმმართველობის არჩევნებთან დაკავშირებით ჩასატარებელი ღონისძიებების უზრუნველსაყოფად სჭირდებოდა.

კერძოდ, წინასაარჩევნო პერიოდში საზოგადოებრივ მაუწყებელზე გადიოდა გადაცემა “თვითმმართველობა 2017”, რომელშიც ადგილობრივი თვითმმართველობის არჩევნებში მონაწილე კანდიდატები საქართველოს სხვადასხვა ქალაქში ამომრჩეველს თავიანთ პროგრამებს აცნობდნენ.

სატელევიზიო ტოქშოუების მედიამონიტორინგის შუალედური ანგარიშის მიხედვით, რომელიც საქართველოს ჟურნალისტური ეთიკის ქარტიამ განახორციელა ევროკავშირისა და UNDP-ის დაფინანსებით, აღნიშნული გადაცემის წამყვანი არ სვამდა კრიტიკულ და სიღრმისეულ შეკითხვებს და მონაწილეებს შორის დებატებიც კი არ გამართულა იმის მიუხედავად, რომ გადაცემის დეკლარირებული მიზანი ეს იყო.

მონიტორინგის შუალედურ ანგარიშში, შინაარსობრივი პრობლემების გარდა, საუბარია ტექნიკურ პრობლემებზეც, რადგანაც გადაცემა ღია სივრცეში იმართებოდა და ბუნებრივ-კლიმატური პირობების გამო თავად მონაწილე კანდიდატებისთვისაც გაუსაძლისი იყო ამ გადაცემაში მონაწილეობა. ამას გარდა, ქარიან ამინდში ეთერში კადრი ყანყალებდა, შემოდიოდა ხმაური და ა.შ.

უფრო მეტიც, 19 ოქტომბერს თბილისის მერობის კანდიდატებს შორის გამართულ დებატებში უშუალოდ გადაცემის სტუმრებმა გამოთქვეს პრეტენზია და შენიშვნები ტექნიკური პრობლემების გამო, ვინაიდან დებატები ღია ცისქვეშ მიდიოდა იქვე მიმდინარე კონცერტის ფონზე. მონაწილეებს არ ესმოდათ კონკურენტების საუბარი, გადაცემა რამდენიმე წუთის მანძილზე პარალიზებული გახდა, ვინაიდან იმ დროს მოხდა ფოირვერკის გაშვება და ფაქტორბივად არაფერი ისმოდა.

საზოგადოებრივ მაუწყებელზე ვასილ მაღლაფერიძის გენერალურ დირექტორად დანიშვნის შემდეგ არაერთი გადაცემა დაიხურა იმ მოტივით, რომ არხს არა აქვს ფინანსური რესურსი და ტექნიკური გადაიარაღებისთვის აუცილებელი იყო რესურსების დაზოგვა.

დაიხურა “რადიო თავისუფლების” ორი გადაცემა, “წითელი ზონა” და “ინტერwiev”, იმ მოტივით, რომ საზოგადოებრივი მაუწყებელი არ აპირებს გარე სტუდიებთან თანამშრომლობას.

 

ნეტგაზეთის მასალების სხვა გამოცემებში გადაბეჭდვის წესი
ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com