დღეს, 3 აგვისტოს მთავრობამ ავტორიზებული აფთიაქების სანებართვო პირობებში ჯანდაცვის სამინისტროს მოიერ მომზადებული ცვლილებები დაამტკიცა. ცვლილებების თანახმად, ფარმაცევტებს, პირველი ჯგუფის – ფსიქოტროპული მედიკამენტების ურეცეპტოდ გაცემის შემთხვევაში, პროფესიული პასუხისმგებლობა დაეკისრებათ და არსებული კანონის დარღვევის გამო, ავტორიზებულ აფთიაქებში პროფესიული საქმიანობის გაგრძელებას ვეღარ შეძლებენ.

აღნიშნულ ცვლილებებთან დაკავშირებით შეხვედრა ჯანდაცვის სამინისტროში 1 აგვისტოს გაიმართა. მინისტრი დავით სერგეენკო ფარმაცევტული კომპანიების ასოციაციების და სამედიცინო ასოციაციების წარმომადგენლებს შეხვდა. მისი თქმით, ვლილებების ინსპირაცია სააფთიაქო ნარკომანიაა, როცა აკრძალვის მიუხედავად რიგი აფთიაქები მაინც აგრძელებენ მომხმარებლებისთვის ურეცეპტოდ ფსიქოტროპული ან სხვა ტიპის მედიკამენტების მიყიდვას.

მომზადებული დოკუმენტის მიხედვით, თუ ფარმაცევტი მომხმარებელს პირველი ან მეორე ტიპის მედიკამენტს ურეცეპტოდ მიჰყიდის, მას ამ კანონდარღვევისთვის პირველი და მეორე მედიკამენტების გაყიდვა გარკვეული დროით აეკრძალება და მხოლოდ ურეცეპტოდ გასაცემი მედიკამენტების რეალიზაციის უფლება ექნება.

აღიშნული ცვლილებები არამხოლოდ ფარმაცევტზე ზემოქმედებს. მას უშუალო ზეგავლენა აქვს იმ საათიაქო კომპანიებზეც, რომელთა ფარმაცევტი კანონს დაარღვევს.  გარდა იმისა, რომ კომპანიას  ჯარიმის, როგორც ადმინისტრაციული სახდელის გადახდა მოუწევს, იგი ასევე ვალდებულია ფარმაცევტი შეცვალოს და ახალი ფარმაცევტი წარადგინოს,  წინააღმდეგ შემთხვევაში მას ავტორიზებული აფთიაქის ნებართვა გაუუქმდება. კომპანია ასევე ვეღარ წარადგენს ისეთ ფარმაცევტს, რომელსაც ამგვარი კანონდარღვევა აქვს ჩადენილი, რადგან ცვლილებების მიხედვით, მსგავსი დარღვევის მქონე ფარმაცევტის წარდგენის შემთხვევაში ავტორიზებული აფთიაქის ნებართვის გაცემა აღარ მოხდება. დეტალურად ცვლილებების შესახებ შეგიძიათ წაიკითხოთ ამ ბმულზე.