ტექნოლოგიები

კავკასუს ონლაინი: მაგისტრალური ინფრასტრუქტურის გასხვისება “ვიმპელკომთან” მოლაპარაკებების საგანი არ არის

7 თებერვალი, 2016 • 2770
კავკასუს ონლაინი: მაგისტრალური ინფრასტრუქტურის გასხვისება “ვიმპელკომთან” მოლაპარაკებების საგანი არ არის

ფოთი-ვარნის წყლისქვეშა ოპტიკურ-ბოჭკოვანი მაგისტრალის “ვიმპელკომისათვის” შესაძლო მიყიდვის შესახებ ირაკლი ალასანიას მიერ გავრცელებულ ინფორმაცია კავკასუს ონლაინი განცხადებას ავრცელებს, რომელსაც უცვლელად გთავაზობთ:

“მაღალი საზოგადოებრივი ინტერესიდან გამომდინარე, განვმარტავთ, რომ ამ ეტაპზე კავკასუს ონლაინს აქვს მოლაპარაკება რამდენიმე მსხვილ სატელეკომუნიკაციო კომპანიასთან, მათ შორის ვიმპელკომთან და მაგთიკომთან საცალო სეგმენტის შესყიდვის თაობაზე. მოლაპარაკებების საგანი არ არის შავი ზღვის კაბელის და სახმელეთო მაგისტრალური ინფრასტრუქტურის გასხვისება. პროცესი არის გამჭვირვალე და კომპანიის იმ აქტივების დეტალური ჩამონათვალი, რომლის შესაძლო გასხვისებაზეცაა საუბარი, გაგზავნილია საქართველოს კომუნიკაციების ეროვნულ კომისიაში, როგორც ამას მოითხოვს კომისიის დებულებები: კომპანიაში მიმდინარე ნებისმიერი ცვლილების, მათ შორის შერწყმის, კომპანიაში წილების ან საოპერაციო აქტივების ნასყიდობის შესახებ ავტორიზებული პირი ვალდებულია მიიღოს კომიისიის წინასწარი თანხმობა. კომისიისთვის გაგზავნილ ჩამონათვალში არ არის შავი ზღვის მაგისტრალური კაბელი, შესაბამისად, ის არ არის კომერციული შეთანხმების ნაწილი”, – ნათქვამია კავკასუს ონლაინის განცხადებაში.

კომუნიკაციების ეროვნული კომისიის თავმჯდომარის განცხადებით, ევროპასთან საქართველოს დამაკავშირებელი ფოთი-ვარნის ოპტიკურ-ბოჭკოვანი მაგისტრალური ხაზი რუსეთში დაფუძნებულ ჰოლდინგ “ვიმპელკომზე” არ გაიყიდება. როგორც ვატო აბაშიძემ ტელეკომპანია იმედის ეთერში სტუმრობისას განაცხადა, ეს საკითხი კომპანიას, რომელიც მაგისტრალზე ოპერირებს, [კავკასუს ონლაინი] დღის წესრიგში საერთოდ არ დაუყენებია.

ინფორმაცია იმის შესახებ, რომ ზემოხსენებული ოპტიკურ-ბოჭკოვანი მაგისტრალური ხაზი შესაძლოა კავკასუს ონლაინისაგან “ვიმპელკომმა” იყიდოს, თავისუფალი დემოკრატების ლიდერმა ირაკლი ალასანიამ გაავრცელა. მისი თქმით, თავისუფალი დემოკრატები ამ საკითხზე უფრო ვრცლად საუბარს ორშაბათს აპირებენ.

“ამ ეტაპზე [ალასანიას ინფორმაციას] საბედნიეროდ არანაირი საფუძველი არ აქვს. ოპტიკურ-ბოჭკოვანი მაგისტრალური კაბელი, რომელიც საქართველოს ევროპასთან ბულგარეთის გავლით აერთებს, არ იყიდება და ვერ გაიყიდება. ამისი შესაძლებლობა არ არსებობს, რადგან ნებისმიერ შემთხვევაში ამ მაგისტრალის გაყიდვისათვის მისმა მეპატორენეებმა კომუნიკაციების ეროვნული კომისიის თანხმობა უნდა მიიღონ. ეს არც მომხდარა და ვერც მოხდება”, – თქვა აბაშიძემ.

რაც შეეხება არგუმენტს, თუ რატომ არ მისცემს კომისია კავკასუსს, სურვილის შემთხვევაში, ოპტიკურ-ბოჭკოვანი მაგისტრალის “ვიმპელკომისათვის” მიყიდვის უფლებას, აბაშიძე ამბობს:

“თანხმობა ვერ იქნება, რადგან ამ არხის მნიშვნელობიდან გამომდინარე (მიუხედავად იმისა, რომ ეს არ არის საქართველოს ინტერნეტით მომარაგების ერთადერთი არხი)… მას აქვს თავისი დანიშნულება, თავისი დატვირთვა, ის მნიშნელოვანია ქვეყნის უსაფრთხოების, უშიშროების და ქვეყნის სატელეკომუნიკაციო ბაზრის კონკურენტულობის შენარჩუნების თვალსაზრისით, ამიტომ ასეთი გადაწყვეტილება ვერ მიიღება”, – განაცხადა აბაშიძემ.

მისი თქმით, საქართველოს კომუნიკაციების ეროვნულმა კომისიამ შპს „მობიტელის“ [ბილაინის სავაჭრო ნიშანი. თავის მხრივ ბილაინი შედის „ვიმპელკომ LTD”-ს კომპანიათა ჯგუფში] და შპს „კავკასუს ონლაინის“ ერთობლივი განცხადების საფუძველზე შპს „მობიტელისთვის“ შპს „კავკასუს ონლაინის“ საცალო მომსახურების სეგმენტის შეძენის თაობაზე ერთობლივი განცხადების განხილვის მიზნით საჯარო ადმინისტრაციული წარმოება მართლაც დაიწყო. თუმცა, როგორც კომისიის მიერ გავრცელებულ ოფიციალურ პრესრელიზშია ნათქვამი, შპს „კავკასუს ონლაინი“ გეგმავს კომპანიის ორ ნაწილად გაყოფას, საცალო მომსახურების სეგმენტის (მაუწყებლობის ტრანზიტის (IPTV), ციფრული სატელეფონო (VOIP) და ინტერნეტის საცალო მომსახურების) შპს „მობიტელისთვის“ გადაცემას, ხოლო საბითუმო ბაზრის სეგმენტზე, რაც გულისხმობს ქსელური ინფრასტრუქტურას და მაგისტრალებს, მათ შორის, საქართველო-ბულგარეთის (ფოთი-ვარნა) დამაკავშირებელ წყალქვეშა ოპტიკურ-ბოჭკოვან მაგისტრალს, ოპერირების გაგრძელებას. საკითხის განხილვის ზეპირი მოსმენის სხდომა 2016 წლის 9 თებერვალს, 15:00 საათზე გაიმართება. გადაწყვეტილებას კომისია ზეპირი მოსმენის სხდომის გამართვიდან ათი სამუშაო დღის ვადაში მიიღებს.

კავკასუს ონლაინის წილის 36.2%-ს ფლობს უცხოური საწარმო International Online Networks LLC, რომელიც ვირჯინიის კუნძულებზეა რეგისტრირებული, 19.8%-ს ფლობს ნელგადო ლიმითედი (ვირჯინიის კუნძულები), ხოლო 44%-ს – გროუს მასთერ ჰოლდინგზ აი-სი (დიდი ბრიტანეთისა და ჩრდილოეთ ირლანდიის გაერთიანებული სამეფო).

რაც შეეხება მობიტელს (ბილაინი): წილის 51%-ს ფლობს „ვოთერთრაილ ინდასტრიზ“ (ვირჯინიის კუნძულები), 29%-ს – „ინვესტიკო ალიანსე“ (ვირჯინიის კუნძულები), 20%-ს – მირენ ინვესტ, (ვირჯინიის კუნძულები (ბრიტ.).

კავკასუს ონლაინის სამეთვალყურეო საბჭოს ხელმძღვანელი ხვიჩა მაქაცარიაა, იგი პარალელურად მობიტელის სამეთვალყურეო საბჭოს წევრიცაა. ასევე ერთდროულად ორივე კომპანიის სამეთვალყურეო საბჭოს წევრია თეიმურაზ არონიაც.

ვახტანგ აბაშიძის განცხადებით, კავკასუს ონლაინი იძლებულია, რომ თავისი საცალო მომსახურების სეგმენტი გაყიდოს, რადგან მას გარკვეული პრობლემები აქვს. მისი თქმით, საუბარია წლების განმავლობაში დაგროვილ ვალდებულებებზე, რომელთა გასტუმრება საკმაოდ მძიმე ტვირთად აწევს.

“მას ასეთი არჩევანი აქვს: ან კონკრეტული კომერციული ნაბიჯები გადადგას, ან გაკოტრება, თუ მისი კომერციული საქმიანობის შემცირება იქნება პერსპექტივაში. აქედან გამომდინარე, კომპანია არა მხოლოდ მობიტელს ესაუბრება, რომელიც საქართველოს რეზიდენტი კომპანიაა და რომლის ერთ-ერთი დამფუძნებელიც ვიმპელკომია (წილის 51%-ის, ხოლო 49 პროცენტის დამფუძნებელბი ქართველი პარტნიორები არიან, რომლებიც ნაწილობრივ ასევე არიან კავკასუს ონლაინის პარტნიორები და დამფუძნებლები). საცალო სეგმენტის ნაწილში შესაძლოა ჩემთვისაც უფრო მისაღები იყოს, რომ რომელიმე დასავლურმა დიდმა კომპანიამ შეიძინოს, მაგრამ მოლაპარაკებები მიდის მათ [მობიტელსა და კავკასუსს] შორის. [საცალო სეგმენტის ნაწილში] რაიმე საზიანო კიბერუსაფრთხოების ან კონკურენტული გარემოს თვალსაზრისით ნაკლებად იქნება, ვიდრე ოტპიკურ-ბოჭკოვანი კაბელის გაყიდვის შემთხვევაში. საცალო მომსახურების გაყიდვის ნაწილში სახელმწიფო მნიშვნელობის საფრთხეს დიდად ვერ ვხედავ. ვინმესთვის შესაძლოა საცალო სეგმენტის არა რუსული კომპანიის მიერ ყიდვა იყოს მისაღები, არამედ შვედეთის ან სხვა ქვეყნის კომპანიის, მაგრამ კავკასუს ონლაინს მოლაპარაკებები ჰქონდა მაგთისთანაც და ვერ შეთანხმდნენ, მოლაპარაკებები ჰქონდა სილქნეტთანაც და ვერ შეთანხმდნენ. საბოლოო ჯამში, არ გამოვრიცხავ, რომ შეთანხმდნენ მობიტელთან”, – განაცხადა აბაშიძემ.

მასალების გადაბეჭდვის წესი