კომერციულმა ბანკებმა და ვალუტის გადამცვლელმა პუნქტებმა დღეს, 9 იანვარს ბაქოში მუშაობა შეაჩერეს. “კავკაზსკი უზელის” ცნობით, მათი გადაწყვეტილება აზერბაიჯანის ცენტრალურ ბანკს უკავშირდება, რომელმაც ვალუტის ყიდვა/გაყიდვის სხვაობის 4% -იანი ზღვარი დააწესა.

“კავკაზსკი უზელი” წერს, რომ ბაქოს ერთ-ერთ ცნობილ ქუჩაზე, სადაც ყველაზე მეტი ვალუტის გადამცვლელი პუნქტია, 20 ასეთი პუნქტიდან მხოლოდ 2 მუშაობს.  მუშაობა შეაჩერეს კომერციულმა ბანკებმა, ძირითად კი “კაპიტალ ბანკის” ფილიალები აღარ მუშაობს. გამოცემის ცნობით, იმ სავალუტო პუნქტებთან, რომლებშიც  მუშაობა არ შეჩერებულა, მოქალაქეების რიგი დადგა.

აზერბაიჯანის ცენტრალურმა ბანკმა ვალუტის ყიდვა/გაყიდვას შორის 4 %-იანი სხვაობის დაწესების გადაწყვეტილება 8 იანვარს მიიღო, რომელიც ძალაში დღეს, 9 იანვარს შევიდა. ცენტარლურ ბანკს მიაჩნია, რომ ამის შემდეგ სპეკუალციური სავალუტო ოპერაციები შემცირდება.

8 იანვრის ოფიციალური კურსით 1 აშშ დოლარი 1,5642 აზერბაიჯანული მანათი ღირს,  ხოლო 1 ევრო 1,7009 მანათს უტოლდება. ოფიციალურად კურსი ორშაბათს, 11 იანვარს განახლდება. იმ სავალუტო ჯიხურებში, რომლებსაც მუშაობა არ შეუჩერებიათ კლიენტები 1 დოლარს 1,62 მანათად ყიდულობენ, ხოლო 1.56 მანათად ჰყიდიან.