„საქართველოს ევროპისკენ მიმავალი გზის ერთადერთობა, ჩემი აზრით, ყველანაირი პოლიტიკის მიღმაა. ამიტომ გამოვხატავ ახლა ჩემს აზრს – არა რუსულ კანონს“ ,- ამბობს დავით გოგიჩაიშვილი, ბიზნესკონსულტანტი და მარკეტერი.
“ქართული ოცნება” ისევ აპირებს რუსული კანონის მიღებას. ანალოგიურმა კანონმა რუსეთში გააქრო ყველა დემოკრატიული ინსტიტუტი და გაამყარა პუტინის რეჟიმი. საქართველოს დასავლელი პარტნიორები ამბობენ, რომ რუსული კანონის გამო ქართველი ხალხის მომავალი სასწორზე დგას.
რატომ უკეტავს ეს კანონი საქართველოს ევროკავშირის კარს? – ვკითხეთ დავით გოგიჩაიშვილს.
„ყველა წარმომადგენელი ამას გვეუბნება. კანონის მუხლებში არაკომპეტენტური ვიქნები, მაგის ექსპერტი არ ვარ, მაგრამ იმის ექსპერტად კი გამოვდგები, მესმოდეს საერთო კონტექსტი. ევროკავშირის წარმომადგენლები გვეუბნებიან, ამერიკა გვეუბნება, ჩვენი დასავლელი მეგობრები გვეუბნებიან, რომ ამ კანონის ასეთი ფორმით მიღება აფერხებს ევროკავშირისკენ მისწრაფებებს“ ,- ამბობს დავით გოგიჩაიშვილი.
2023 წლის მარტში მასობრივი პროტესტის შემდეგ “ოცნებამ” უკან გაიწვია რუსული კანონპროექტი და პირობა დადო, რომ მას აღარასოდეს დაუბრუნდებოდა.
„რა მოუტანა ამ კანონმა რუსეთს, რა დღეში ჩააგდო, ამას ხომ ვხედავთ და, რაც მთავარია, იმასაც ხომ ვხედავთ, რომ ეს ერთხელ უკვე იყო.
ჩემი მთავარი გაკვირვება რა არის, იცით? ეს ხომ უკვე იყო.
ეს კანონი ხომ იყო ინიციირებული. ამან გამოიწვია პროტესტი და ადამიანები გამოვიდნენ ქუჩაში მარტის აქციებზე. მერე ამ კანონის ინიციატორებმა თქვეს – ოკ, ბოდიში, უკან მიგვაქვს ეს კანონი და ჩვენს გეგმებში არ შედის ამ კანონის თავიდან ინიციირება, დამთავრდა ეს ინიციატივა ამით.
ახლა არ ვიცი, რა შეიცვალა. ეს არის მთავარი გამოცანა“, – ამბობს დავით გოგიჩაიშვილი.
რა იქნება თქვენი, როგორც საქართველოს ერთი რიგითი მოქალაქის გზავნილი სხვა მოქალაქეებისა და მთავრობისადმი, ჰკითხა ნეტგაზეთმა დავით გოგიჩაიშვილს.
„ჩემი გზავნილი დღეს იქნება იგივე, რაც იყო შარშან, მარტის აქციების დროს – გაუმარჯოს საქართველოს და გაუმარჯოს საქართველოს ევროპაში. შესაბამისად, არ გაუმარჯოს არაფერს, რაც ამ გზაზე ჩვენთვის იქნება ხელის შემშლელი.
არა მხოლოდ რუსული კანონი იგულისხმება აქ, არამედ საერთოდ ყველაფერი. იმიტომ, რომ ევროპისკენ… ევროპაში დაბრუნებაში, ევროკავშირში გაწევრიანებაში რაც ხელს შეგვიშლის, იმას არაფერს არ გაუმარჯოს.
საქართველო ევროპისკენ მივდივართ. ამაზე ყველა ვთანხმდებით“, – ამბობს დავით გოგიჩაიშვილი.
