გაერთიანებული შტაბის ყოფილი უფროსი, გადამდგარი გენერალი ვლადიმერ ჩაჩიბაია აცხადებს, რომ დეპუტატის მანდატის დატოვება სურს. ამის შესახებ დეპუტატმა, რომელმაც მხარი არ დაუჭირა “უცხოური გავლენის გამჭვირვალობის” შესახებ რუსული კანონის ანალოგს, “დროებას” განუცხადა.
“ჩემი პირადი სურვილია, რომ დავტოვო მანდატი. ჩემი დაჟინებული თხოვნაა, რომ მე დავტოვო პარლამენტი. მე ვფიქრობ, რომ საპარლამენტო ცხოვრებისთვის მზად არ აღმოვჩნდი . 30 წელი ჯარში ვიყავი, ჩემი პირადი სურვილია, რომ გამოვიდე პარლამენტიდან და ვნახოთ, ამავდროულად ვრჩები ჩვენი პარტიის ერთგული წევრი”, – განაცხადა ჩაჩიბაიამ.
ის ფიქრობს, რომ სხვა სამუშაოზე უფრო მეტად მოახდენს საკუთარი თავის რეალიზებას. ის, რომ მან კანონპროექტს მხარი არ დაუჭირა, დეპუტატის შეფასებით, ასევე არის ფაქტორი, რაც მას არ აძლევს “უფლებას და საშუალებას დარჩეს პარლამენტში”.
“მანდატს დავტოვებ და გამოვალ ალბათ პარლამენტიდან, თუმცა საბოლოოდ მაინც პარტიის ხელმძღვანელობასთან გავისაუბრებ, ჩემი პირადი და დაჟინებული თხოვნაა, რომ ეს საკითხი დადებითად გადაწყდეს”.
დეპუტატის თქმით, მისი პოზიციის შესახებ პარტიის ხელმძღვანელობაში ყველამ იცის, თუმცა “არის რაღაც, რაც საჭიროებს დამატებით განხილვას”.
რაც შეეხება მის პოზიციას ზემოხსენებულ კანონპროექტთან დაკავშირებით:
“ჩემი პოზიცია რაც დავაფიქსირე, ეფუძნებოდა გარკვეულ ახსნას. მე ვფიქრობ არის საკითხები რაც შიდა პარტიულ განხილვას საჭიროებს, ვიდრე ასე საზოგადოდ მსჯელობას. ამას ჩემთვის დავიტოვებ”.
7 მარტს საქართველოს პარლამენტის 76-მა დეპუტატმა სესიაზე პირველი მოსმენით დაუჭირა მხარი რუსულ კანონპროექტს, რომლის მიზანიც ქვეყანაში მედიისა და სამოქალაქო სექტორის დისკრედიტაცია და შეზღუდვაა.
მსგავსი კანონი რუსეთში 2012 წელს მიიღეს და მას შემდეგ ქვეყანაში, ფაქტობრივად, გაქრა დამოუკიდებელი მედია და სამოქალაქო სექტორი. ისინი ჯერ „უცხოეთის აგენტებად“ გამოაცხადეს, შემდეგ კი საქმიანობაც აუკრძალეს.
კანონს საქართველოს დასავლური ინტეგრაციის შემაფერხებლად მიიჩნევენ საქართველოს დასავლელი პარტნიორები, მათ შორის, აშშ და ევროკავშირი.
კენჭისყრის შედეგების მიხედვით, „ქართული ოცნების“ ოთხმა დეპუტატმა შეიკავა თავი რუსული კანონის მხარდაჭერისგან. ოთხივე მათგანი სხდომას დაესწრო, თუმცა, კენჭისყრაში მონაწილეობა არ მიუღია.
ეს დეპუტატები არიან:
1. დავით სერგეენკო – არ მონაწილეობდა კენჭისყრაში;
2. ვლადიმერ ჩაჩიბაია – არ მონაწილეობდა კენჭისყრაში;
3. ქეთევან დუმბაძე – არ მონაწილეობდა კენჭისყრაში;
4. ირაკლი მეძმარიაშვილი – არ მონაწილეობდა კენჭისყრაში
თუმცა, მოგვიანებით, პროსახელისუფლებო Post TV-მ გაავრცელა ინფორმაცია, სადაც ირაკლი მეძმარიაშვილიც და ქეთევან დუმბაძეც აცხადებენ, რომ რეალურად მათ კანონპროექტს მხარი დაუჭირეს და ადგილი ჰქონდა ტექნიკურ ხარვეზს.
პარლამენტის საგარეო ურთიერთობათა კომიტეტის თავმჯდომარის მოადგილემ გიორგი ხელაშვილმა, მიუხედავად იმისა, რომ კენჭისყრას ესწრებოდა, რეგისტრაცია არ გაიარა და რუსულ კანონპროექტს მხარი არ დაუჭირა.
კენჭისყრაში მონაწილეობა არ მიუღიათ ნინო იობაშვილსა და ელგუჯა გოცირიძეს.
საბოლოოდ საზოგადოების პროტესტის შემდეგ ხელისუფლებამ კანონი ჩააგდო.
