“ამ კანონის მიღება ჩვენი ქვეყნის და ერის ღალატია. ეს არის რუსეთში მიღებული სამარცხვინო კანონის ანალოგი, რომელიც მიმართულია განვითარების წინააღმდეგ და მიზნად ისახავს სამოქალაქო თავისუფლების ჩახშობას“, – ასე ეხმაურება “ნეტგაზეთთან” კინორეჟისორი ნანა ჯორჯაძე კანონპროექტს, რომლის მიღებასაც ხელისუფლება გეგმავს და რომელიც საქართველოს მოქალაქეებს „უცხოური გავლენის აგენტებად“ გამოაცხადებს.
„მას არავითარი კავშირი არ აქვს ფინანსურ გამჭვირვალობასთან, რაც ისედაც მრავალი კანონით კონტროლდება. ეს კანონი ჩვენ გვაშორებს მსოფლიო ცივილიზაციას და რუსეთის ჭაობში გვექაჩება.
რადგან ეს კანონი საქართველოს თითოეულ მოქალაქეს და ქვეყნის მომავალს ეხება, ახლა გაჩუმების დრო არ არის.
ყველამ უნდა გამოვხატოთ ჩვენი პროტესტი ამ დამღუპველი კანონის წინააღმდეგ“, – უთხრა „ნეტგაზეთს“ ნანა ჯორჯაძემ.
უკვე ერთ კვირაზე მეტია, საქართველოში არაერთი საზოგადოებრივი ჯგუფი ეწინააღმდეგება საპარლამენტო უმრავლესობის რუსულ კანონპროექტს, რომლის მიზანი ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა. ანალოგიური კანონი რუსეთში 2012 წლიდან სწორედ სამოქალაქო ორგანიზაციებისა და მედიის რეპრესიებისა და საბოლოოდ, ქვეყნიდან გასაძევებლად გამოიყენეს.
მიუხედავად საქართველოში დაწყებული საზოგადოების პროტესტისა, პარლამენტმა საკომიტეტო მოსმენებიც დაიწყო, რომელზე დასწრების საშუალება არ მისცეს იმ ადამიანთა დიდ ნაწილს, რომლებსაც ეს კანონპროექტი ეხება.
კანონის მიღებას ასევე ეწინააღმდეგება აშშ, ევროკავშირი და არაერთი დასავლური ორგანიზაცია. მეტიც ევროკავშირი აცხადებს, რომ ეს კანონი შეუთავსებელია 12-პუნქტიან რეკომენდაციასთან, რომელიც საქართველოს ევროკავშირში გაწევრებისთვის სჭირდება.
- დინამოს დიდი ოჯახი მხარს უჭერს საქართველოს ევროპულ გზას — FC Dinamo
- „მივმართავ ბლოგერებს, იუთუბერებს – დააფიქსირეთ თქვენი მოქალაქეობრივი პოზიცია“
- რატომაა საშიში რუსული კანონი — 5 კითხვა, 5 პასუხი
- „საქართველოს მომავალი მხოლოდ ევროპული შეიძლება იყოს და დაუშვებელია მისი გადახედვა“ — შოთა არველაძე