კომენტარი

თამარ ხიდაშელი “იდეოლოგიების ჭიდილში”

7 სექტემბერი, 2015 • • 1897
თამარ ხიდაშელი “იდეოლოგიების ჭიდილში”

პირველ რიგში, გთხოვთ დაგვიზუსტოთ როდის გახდით რესპუბლიკური პარტიის წევრი, რადგან  საიას თავმჯდომარეობის შემდეგ თქვენ საერთაშორისო ორგანიზაციებში მუშაობდით.

 

სულ ახლახან, დაახლოებით ორი კვირა იქნება.

 

ვინ შემოგთავაზათ?

 

ბატონ დავით ბერძენიშვილთან და ხათუნა სამნიძესთან მქონდა საუბარი.

 

პარტიაში გაწევრიანება და საგარეჯოში მაჟორიტარობის კანდიდატობა ერთდროულად შემოგთავაზეს?

 

რა თქმა უნდა.

როდესაც ღარიბაშვილმა საზოგადოების წინაშე წარგადგინათ, თქვენ თქვით, რომ რესპუბლიკურ პარტიასთან და კოალიციასთან საერთო ღირებულებები გაკავშირებთ და სწორედ ამიტომ დათანხმდით ამ შემოთავაზებას.  რა საერთო ღირებულებები გაქვთ, მაგალითად, კოალიციაში შემავალ თამაზ მეჭიაურთან, რომელიც სიტყვა სოროსელს, ენჯეოშნიკს და მქსოველს ნეგატიურ კონოტაციაში ხედავს… პრინციპში სხვა დეპუტატების არაერთი დაახლოებით მსგავსი განცხადებების გახსენებაც შემიძლია.

 

დიახ, მაგრამ ჩვენ ასევე შეგვიძლია გავიხსენოთ კოალიცია “ქართული ოცნების” სხვა წარმომადგენლების განცხადებები, რომლებიც ბატონი თამაზის ამ გამონათქვამს გაემიჯნენ, იგივე თამარ კორძაია, თინათინ ხიდაშელი.

 

“ქართული ოცნება”- ეს არის კოალიციური ერთობა, რომელიც რამდენიმე პარტიისაგან შედგება და მე არ მითქვამს, რომ თითოეულ ადამიანთან მექნება ღირებულებითი თანხვედრა… მე ჩემს გამოსვლაში აქცენტი ზოგად ლიბერალურ ღირებულებებეზე გავაკეთე.

 

აქვე გეტყვით, რომ მე პირადად ვმუშაობდი არასამთავრობო ორგანიზაციაში. სოროსის ფონდის და დიდი ბრიტანეთის მთავრობის დაფინანსებით ვიყავი ინგლისში სასწავლებლად 2005-2006 წლებში, საიაში სწორედ სოროსის ფონდის ხელშეწყობით არაერთ პროექტს ვახორციელებდით, იქნება ეს არჩევნებზე დაკვირვება, სახელმწიფო ინსტიტუტების გამჭვირვალობა თუ იურიდიული დახმარების ცენტრების მეშვეობით ადამიანის უფლებების დაცვა. ასე რომ, ჩემთვის შეურაცხმყოფელი და დამაკნინებელი არაფერია იმაში, რომ ადამიანი ენჯეოშნიკი იყოს და სოროსის ფონდიდან ფინანსდებოდეს. ძალიან სამწუხარო და უხერხულია, რომ ბატონმა მეჭიაურმა ეს სიტყვები სწორედ უარყოფით კონტექსტში გამოიყენა სახელმწიფოს მეთაურის მიმართ.

 

ანუ თქვენ ერთგვარად დიფერენცირებას აკეთებთ: კოალიცია არ არის ერთი მთლიანი ორგანიზმი და ყოფთ, მეჭიაური… სხვა ბევრი ადამიანიც შეგვიძლია გავიხსენოთ და ცალკე დგანან თამარ კორძაია, უსუფაშვილი…

ასე არ გავყოფდი, მაგრამ ვიტყოდი, რომ კოალიცია რამდენიმე პარტიის გაერთიანებაა. ამ პარტიებში ბევრი ადამიანია და, რა თქმა უნდა, თითოეულ მათგანთან აბსოლუტური თანხვედრა ღირებულებებში მე არ მექნება. მე ვილაპარაკე იმ ზოგად ღირებულებებზე, რომელიც “ქართული ოცნების” კოალიციას ჰქონდა, როდესაც 2012 წელს არჩევნებზე გამოვიდა და იმ ლიბერალურ ღირებულებებზე, რომელზეც რესპუბლიკური პარტია დგას უკვე მრავალი წელია. როგორც გითხარით, ასეთი ტიპის გამონათქვამებს ვემიჯნები და ვფიქრობ, ძალიან სამწუხაროა, როცა პარლამენტის ტრიბუნიდან ასეთი განცხადებები კეთდება.

რას ფიქრობთ ჯორჯ სოროსზე?

 

ჯორჯ სოროსზე ცუდს რატომ უნდა ვფიქრობდე მაშინ, როდესაც მისი ხელშეწყობით არაერთი ქვეყნიდან ძალიან ბევრი ახალგაზრდა იღებს განათლებას მოწინავე დემოკრატიულ ქვეყნებში და მისი დახმარებით ხელი ეწყობა გამჭვირვალე საზოგადოებების ჩამოყალიბეებას განსაკუთრებით პოსტსაბჭოთა სივრცეში. მის საქმიანობას უაღრესად დადებითად ვაფასებ.

 

ბიძინა ივანიშვილზე რას ფიქრობთ?

 

ბიძინა ივანიშვილი რომ არ ყოფილიყო, 2012 წელს “ქართული ოცნების” კოალიცია ასე დამაჯერებლად ვერ გაიმარჯვებდა. ბიძინა ივანიშვილმა გარდამტეხი როლი ითამაშა იმაში, რომ ნაციონალური მოძრაობა დამარცხებულიყო და მისი რეჟიმი დასრულებულიყო.

რაც შეეხება ივანიშვილის როლს მას შემდეგ, რაც მან “ქართული ოცნება” დატოვა. როგორია თქვენი დამოკიდებულება იმ ფაქტებთან დაკავშირებით, რომელიც პოლიტიკიდან წასვლის შემდეგ ხელისუფლებასა და სამთავრობო გადაწყვეტილებაზე ბიძინა ივანიშვილის გავლენას უკავშირდება. რა რეაქცია გექნებათ არაფორმალური მმართველობის ყოველ გამოვლინებაზე?

 

მე ვფიქრობ, რომ ქვეყანაში არაფორმალური მმართველობა არ უნდა არსებობდეს და ყველაფერი ძალიან ღიად და გამჭვირვალედ უნდა იყოს.

 

დღეს არის?

 

უშუალოდ არ ვიცი, რა ხდება სახელისუფლებო კულუარებში, ისევე როგორც თქვენ, მეც ამ ყველაფერს როგორც სამოქალაქო სექტორის წარმომადგენელი ისე ვაკვირდებოდი. ამიტომ თქვენი ნებართვით ვითხოვ დროს, რომ ამ დეტალებში უფრო კარგად გავერკვე.

 

როგორც მოქალაქეს და როგორც პროცესის დამკვირვებელს, თუ გაქვთ თქვენი აზრი ჩამოყალიბებეული?

 

ჩემთვის ნათელი იყო, რომ ბატონი ბიძინა ივანიშვილის რეკომენდაციებს გადამწყვეტი მნიშვნელობა ჰქონდა ხელისუფლების ზოგიერთი წარმომადგენლის გადაწყვეტილებაზე. ამაზე ყველა ვსაუბრობდით და, მე მგონი, დამალულიც არ არის, ისინიც ამბობდნენ, რომ ბატონი ბიძინა ივანიშვილის რეკომენდაციებს მხედველობაში იღებდნენ.

 

ეს მხოლოდ რეკომენდაციები იყო, ბიძინა ივანიშვილის განსაკუთრებული სტატუსიდან გამომდინარე?

 

განსაკუთრებულ სტატუსს რას ეძახით?

 

რაზეც თქვენ ისაუბრეთ, რომ  ბიძინა ივანიშვილი არის დამფუძნებელი და მის გარეშე კოალიცია “ქართული ოცნება” ვერ გაიმარჯვებდა. ანუ მისი რეკომენდაცია, რომელსაც ხელისუფლებას მისცემს, მხოლოდ რეკომენდაცია იქნება თუ უფრო მეტი?

 

მე არ ვიცი ხელისუფლებაში მყოფი ადმაიანები როგორ იღებენ რეკომენდაციებს… ამას როგორც სავალდებულოდ შესასრულებელს ისე უყურებენ, თუ მხოლოდ რეკომენდაციად იღებენ.

თქვენ ასევე მიანიშნეთ იმაზე, რომ პარლამენტში ადამიანის უფლებების საკითხის დაცვაზე მუშაობა იქნება მთავარი პრიორიტეტი. შეგიძლიათ უფრო მეტი გვითხრათ ამ თემაზე, კონკრეტულად რის გაკეთებას აპირებთ?

 

ძალიან ბევრი თემა ამ წლების განმავლობაში მე პირადად მაწუხებდა: ეს იყო სასამართლოს დამოუკიდებლობა. მე ვფიქრობ, ამ მიმართლებით ბევრი რამ გაკეთდა, თუმცა არის რაღაც თემები, რაზეც უფრო მეტი მუშაობაა აუცილებელი, იყო პირადი ცხოვრების დაცვასთან დაკავშირებული საკითხები და ამასთან დაკავშირებითაც იყო კითხვის ნიშნები. ამ მიმართულებებით, მე ვფიქრობ, კიდევ იქნება სამუშაო და ყოველგვარი მოკრძალების გარეშე გეტყვით, რომ მე შემიძლია ძალიან პრინციპული პოზიციები დავიკავო  და გავახმიანო ის წუხილები, რაც სამოქალაქო საზოგადოების წარმომადგენლებს გვქონდა ან იმ ეტაპზე ექნებათ.

 

რაიმე კონკრეტული იდეა ხომ არ გაქვთ იმ საკანონმდებლო გადაწყვეტილებასთან დაკავშირებით, რომელიც პარლამენტს ჯერ არ მიუღია და რისი მიღებაც კარგი იქნებოდა ადამიანის უფლებების დაცვის მიმართულებით.

 

გარკვეული საკნაონმდებლო აქტი, რომელიც კარგი იქნებოდა, რომ მიეღოთ… არა ასე არ მიფიქრია.

ბევრია ისეთი ადამიანი, ვინც თავს უფლებადამცველს უწოდებს და  მუშაობს ადამინის უფლებების თემაზე, თუმცა ხშირ შემთხვევაში მათი პრიორიტეტების ფორმულა ასეთია ხოლმე, უმცირესობის ყველა ჯგუფს მინუს – ლგბტ თემი. თქვენ შემთხვევაში როგორ იქნება ეს საკითხი?

 

ჩემს შემთხვევაში ასე არ არის. მე ძალიან თამამად გეტყვით, რომ მჯერა ადამიანთა თანასწორობის და ჩემთვის არ არსებობს არანაირი მინუსები.

თქვენმა თანაპარტიელმა დავით ბერძენიშვილმა განაცხადა, რომ შუალედური არჩევნები, რომელშიც თქვენ პატრიოტთა ალიანსის წარმომადგენელი გიპირისპირდებით, იქნება არჩევნები პოლიტიკურ იდეოლოგიებს შორისო. თქვენც იზიარებთ ამ მოსაზრებას?

საგარეჯოში ჩემს კონკურენტს მკვეთრი, უფრო ნაციონალისტური პოლიტიკური მესიჯები აქვს მაშინ, როდესაც ჩვენი მესიჯები ამისგან განსხვადვება: ეს არის ევროინტეგრაცია, ლიბერალური ფასეულობები და ასე შემდეგ. დიახ, შეიძლება ასეც ითქვას, რომ ეს იქნება იდეოლოგიების ჭიდილი.

ანუ თუ არჩევნებში დამარცხდებით, ეს აპრიორი ნიშნავს საქართველოში პროდასავლური საგარეო ორიენტაციის მარცხს?

 

არ განვაზოგადებ იმიტომ, რომ საგარეჯო ერთ-ერთია ბევრი ოლქიდან, ასე რომ, საგარეჯოს მაგალითზე არ გამოვიტანდი საბოლოო დასკვნებს და არც იმას ველი, რომ საგარეჯოში დავმარცხდები.

ეს იქნება ჭიდილი იდეოლოგიებს შორის, როგორც თქვენ ამბობთ,  თუ ბრძოლა ჯერჯერობით შეუსრულებელი დაპირებების მქონე პოლიტიკურ კოალიციასა და ახალ ძალას შორის, ირმა ინაშვილის სახით. ამით იმის თქმა მსურს, რომ შესაძლოა ამომრჩეველმა უფრო ყოფით საკითხებზე გააკეთოს აქცენტი და არა იდეოლოგიებსა თუ მასშტაბურ თემებზე.

 

დედაჩემი კახელია და მე ვიცი, რომ კახელები ძალიან პრაგმატული ადამიანები არიან და ისინი თანაბრად მიაქცევენ ყურადღებას, როგორც კონკრეტულ დაპირებებს, ასევე ძალიან მნიშნელოვან აქცენტს გააკეთებენ საგარეო ვექტორზე, რომელიც ქვეყანამ უნდა აირჩიოს.

 

თქვენ ასევე თქვით, რომ თინა ხიდაშელის დაპირებებს მიიყვანთ ბოლომდე. თინა ხიდაშელს გაცემული ჰქონდა დაპირებები ძალიან ყოფით საკითხებზე…

 

მათ შორის, თუმცა თინა ხიდაშელს ჰქონდა ბევრი დაპირება, რომელიც დემოკრატიული ინსტიტუტების მშნებლობას უკავშირდებოდა.

 

ცოტა ხნის წინ კახეთის საინფორმაციო სააგენტოს ჰქონდა გავრცელებული ერთგვარი ფაქტ-ჩეკი იმის შესახებ, თუ რა დაპირებებს გასცემს ხიდაშელი საგარეჯოს ერთ-ერთ სოფელ უდაბნოში და რა შესრულდა იქიდან, იგი საუბრობდა გზაზე, წყალზე, გაზზე, ამბულატორიაზე, საბავშვო ბაღზეც…

 

ამბულატორია და საბავშვო ბაღი არის შესრულებული…

 

თქვენი აზრით, პარლამენტის მომავალი წევრი უნდა იძლეოდეს ისეთ დაპირებებს, რომლის განხორციელებაც თვითმმართველობის საქმეა?

 

ადგილობრივ თვითმმართველობასა და საკანონმდებლო ხელისუფლებას შორის კომპეტენციების გამიჯვნას, რა თქმა უნდა, ძალიან დიდი, გადამწყვეტი მნიშვნელობა აქვს, მაგრამ თინა ხიდაშელი იმ შემთხვევაში აპელირებდა იმით, რომ ის იყო მთლიანად ნაციონალური მოძრაობის სახელისუფლებო პოლიტიკა, ის მხოლოდ ენმ-ის ადგილობრივი თვითმმართველობის წარმომადგენლებს არ აკრიტიკებდა და ზოგადად სახელისუფლებო დაპირებას იძლეოდა, როგორც ცენტრალურ, ისე ადგილობრივ დონეზე, თუმცა მე ჩემი კამპანიის დროს ძალიან მკვეთრად გავამახვილებ ყუარადღებას იმაზე, რომ კომპეტენციები გამიჯნულია.

 

რაზე გააკეთებთ აქცენტს?

 

ახლა მიმდინარეობს მუშაობა იმ კონკრეტულ პროგრამაზე, რომელსაც ამომრჩეველს შევთავაზებთ და ამაზე ცოტა მოგვიანებით ვისაუბრებ. ახლავე შემიძლია გითხრათ, რომ მე ვიქნები მთელი საქართველოს მოსახლეობის და უშუალოდ საგარეჯოში ჩემი ამომრჩევლის უფლებების დამცველი. თუ დავინახავ, რომ რომელიმე მათგანის უფლება უსამართლოდ იზღუდება, ვინმე უსამართლო მოპყრობის მსხვერპლია და ასე შემდეგ, მე ვიდგები მათ გვერდით ბოლომდე ჩემი კომპეტენციის ფარგლებში.

 

თვითმმართველობის კომპეტენციაში შეიჭრებით თუ არა დაპირებების ნაწილში?

 

არა, ყველანაირად ვეცდები, რომ არ შევიჭრა.

 

მაშინ როგორ მიიყვანთ თინა ხიდაშელის დაპირებებს ბოლომდე?

 

წყალგაყვანილობა, გაზით მომარაგება, რა თქმა უნდა, ადგილობრივი თვითმართველობის გადასაწყვეტი საკითხებია, მაგრამ იქ შეიძლება რაღაცების მოკითხვა, მოთხოვნა, რომ რაღაცები დაჩქარდეს, თუმცა მხოლოდ იმ კომპეტენციის და მანდატის ფარგლებში, რაც დეპუტატს აქვს.

 

ბოლოს მინდა გკითხოთ საარჩევნო სისტემაზე, როდესაც საუაბრი არის ხოლმე იმაზე, რომ უნდა შეიცვალოს და გაუქმდეს მაჟორიტარული სისტემა, ხშირად აპელირებენ იმის თაობაზე, რომ ამაზე პარლამენტში მყოფი მაჟორიტარები არ არიან თანახმა და ჭირს შესაბამისი ოდენობის ხმების მოგროვება.

მე არ გავხდები ის მაჟორიტარი, რომელიც იტყვის, რომ მაჟორიტარული სისტემა არ უნდა გაუქმდეს. მე მხარს ვუჭერ, რომ ეს [მოქმედი] სისტემა გაუქმდეს.


თამარ ხიდაშელი © ქართული ოცნების პრესსამსახური
თამარ ხიდაშელი © ქართული ოცნების პრესსამსახური

მასალების გადაბეჭდვის წესი