“ალია ჰოლდინგმა” გამოაქვეყნა დაკავებული ფოტორეპორტიორის გიორგი აბდალაძის მიმართვა საქართველოს პრეზიდენტისადმი, რომელსაც უცვლელად გთავაზობთ:

“ბატონო მიხეილ,

მეოთხე დღეა თქვენი უშუალო ბრძანებით პატიმრობაში ვიმყოფები. ოთხი დღეა ვფიქრობ, რამ გაგაღიზიანათ ასე და რისთვის გადაწყვიტეთ ჩვენი დასჯა. თქვენ, რა თქმა უნდა კარგად იცით, რომ არც ერთ ჩვენთაგანს არაფერი დაგვიშავებია და მხოლოდ ჩვენს პროფესიულ მოვალეობას ვასრულებდით. სწორედ ამისთვის ვისჯებით?!

ბატონო მიხეილ!

მე ერთხელ ვთქვი და კიდევ ვიმეორებ _ თავს გავწირავ ჩემი სიმართლის და თავისუფალი სიტყვის დასაცავად. აქედან ან ცოცხალი და მართალი გამოვალ, ან მკვდარი, მაგრამ mainc მართალი! სწორედ ეს გამოაფხიზლებს ქართულ მედიას, საერთაშორისო საზოგადოებას და ჩვენს ხალხს.

მე მართალი ვარ!!! მე ჩემი ქვეყნის საზიანო არასოდეს არაფერი გამიკეთებია!!! ეს თქვენ ყველაზე უკეთ იცით!!!

გიორგი აბდალაძე”