საქართველოს ფინანსთა სამინისტროს საგამოძიებო სამსახურმა, საკვები პროდუქტის ფალსიფიკაციის ბრალდებით სამი პირი სისხლის სამართლის პასუხისგებაში მისცა.

უწყების ინფორმაციით, მეწარმები – თ. თ; გ. ნ. და ზ. ხ. შემოსავლების გაზრდის მიზნით, სისტემატურად ახორციელებდნენ ფალსიფიცირებული მარილის რეალიზაციას. კერძოდ, სამსახურის ცნობით, ბრალდებულები აფასოებდნენ არაიოდიზირებულ მარილს და საცალო ბაზარზე მოტყუებით ასაღებდნენ, როგორც იოდიზირებულ პროდუქტს, რამაც მომხმარებლის უფლების მნიშვნელოვანი დარღვევა გამოიწვია.

სამივე მოქალაქეს ბრალი წარედგინათ საქართველოს სისხლის სამართლის კოდექსის 197 – ე მუხლის პირველი ნაწილით (ფალსიფიკაცია, ესე იგი მოტყუებით ნივთის თვისობრიობის შეცვლა მწარმოებლის ან გამსაღებლის მიერ, ჩადენილი ანგარებით) გათვალისწინებული დანაშაულით, რაც  1 – დან 3 წლამდე თავისუფლების აღკვეთას ითვალისწინებს.