საქართველოს წარდგენილი ფილმი “მოირა” ოსკარის დაჯილდოებაზე ვერ მოხვდება

ამერიკის კინოაკადემიამ საუკეთესო უცხოენოვანი ფილმის კატეგორიაში ნომინაციისთვის 9 კონკურენტი ფილმის ნუსხა გამოაქვეყნა, რომელშიც საქართველოს სახელით წარდგენილი ფილმი “მოირა” არ მოხვდა.
ლევან თუთბერიძის ფილმი „მოირა“ არის ისტორია ძმების შესახებ, რომელთაც პატარა თევზსაჭერი გემი აქვთ და ბედისწერის ქალღმერთის, მოირას სახელი ჰქვია. მეთევზე ძმები საარსებო ფულის შოვნას აპირებენ, მაგრამ ბედისწერა მოულოდნელი და დაუნდობელია. საქართველომ ფილმის ოსკარზე წარდგენის გადაწყვეტილება 2015 წლის 12 სექტემბერს მიიღო.
ოსკარის დაჯილდოების 9 ნომინანტი ფილმი შემდეგია: “ახალთახალი ახალი აღთქმა” (ჟაკო ვან დორმაელი, ბელგია) “გველის ჩახუტება” (კირო გუერა, კოლუმბია), “ომი” (ტობიას ლიდჰომი, დანია), “მოფარიკავე” (კლაუს ჰარო, ფინეთი), “მუსტანგი” (დენის გამზე ერგუვენი, საფრანგეთი), “ტყუილების ლაბირინთი” (ჯულიო რიჩარელი, გერმანია), “საულის შვილი” (ლასლო ნემეში, უნგრეთი), “ვივა” (პედი ბრენოკი, ირლანდია), “თეები” (ნაჯი ანუ ნოვარი, იორდანია).
აღნიშნულ კატეგორიაში განაცხადი თავდაპირველად სულ 80 ფილმს ჰქონდა წარდგენილი. მეორე ეტაპზე საუკეთესო უცხოენოვანი ფილმის კატეგორიაში ნომინანტებს შეარჩევენ ნიუ იორკიდან, ლოს ანჯელესიდან და ლონდონიდან მიწვეული სპეციალისტები, რომლებიც 8-10 იანვარს დაასახელებენ 5 ნომინანტ ფილმს, რომელთაც მაყურებელი 2016 წლის 14 იანვარს ოსაკარის დაჯილდოების ცერემონიაზე სხვა ნომინანტ ფილმებთან ერთად იხილავს.