გერმანიის ბუნდესტაგის დეპუტატი ფრანკ შვაბე აცხადებს, რომ აზერბაიჯანში პოლიტიკური პატიმრების რაოდენობა იზრდება, ხელისუფლება კი ადამიანის უფლებებთან დაკავშირებულ საერთაშორისო ვალდებულებებს არ ასრულებს.
შვაბემ ამის შესახებ Meydan TV-სთან ინტერვიუში ისაუბრა. დეპუტატი ბერლინში იმ გამოფენას დაესწრო, რომელიც აზერბაიჯანში დაპატიმრებული ჟურნალისტების მხარდასაჭერად მოეწყო.
შვაბეს თქმით, გერმანიასა და აზერბაიჯანს შორის ეკონომიკური ურთიერთობები არ ნიშნავს, რომ გერმანიამ ქვეყანაში ადამიანის უფლებების მდგომარეობაზე საუბარი უნდა შეწყვიტოს.
„აზერბაიჯანთან შეიძლება ეკონომიკური ურთიერთობები გვქონდეს, მაგრამ ეს არ ნიშნავს, რომ ქვეყანაში მიმდინარე მოვლენებზე უნდა გავჩუმდეთ“, – განაცხადა მან.
დეპუტატის შეფასებით, ბოლო ათი წლის განმავლობაში აზერბაიჯანში მდგომარეობა გაუარესდა. მისი თქმით, ხელისუფლება არ ასრულებს როგორც ევროპის საბჭოს წინაშე აღებულ ვალდებულებებს, ისე ადამიანის უფლებათა ევროპული სასამართლოს გადაწყვეტილებებს.
შვაბე მიიჩნევს, რომ პოლიტიკური პატიმრების გათავისუფლების საკითხი საერთაშორისო დღის წესრიგში მუდმივად უნდა რჩებოდეს. მისი თქმით, სხვა ქვეყნების მთავრობებმა აზერბაიჯანთან მოლაპარაკებებისას ამ ადამიანების გათავისუფლება უნდა მოითხოვონ, საერთაშორისო ორგანიზაციებმა კი ქვეყნის მიმართ ზეწოლა გააძლიერონ.
„ჩვენ არ ვითხოვთ რაიმე უჩვეულოს. უბრალოდ, გვინდა, რომ აზერბაიჯანმა შეასრულოს ის ვალდებულებები, რომლებიც თავად იკისრა“, – თქვა მან.
შვაბემ ასევე აღნიშნა, რომ აზერბაიჯანის ხელისუფლების წარმომადგენლები მასთან ამ საკითხებზე არ საუბრობენ და ქვეყანაში ჩასვლის უფლებაც არ აქვს. მისი თქმით, ევროპაში აზერბაიჯანში შესვლა 70-ზე მეტ დეპუტატს აქვს აკრძალული.
დეპუტატმა დადებით მაგალითად დაასახელა ეკონომისტ ყუბად იბადოღლუს შემთხვევა, რომელმაც აზერბაიჯანის დატოვება შეძლო. მისი ვარაუდით, ეს შესაძლოა საერთაშორისო ძალისხმევის შედეგი იყოს.
