გავლენიანმა გამოცემა Politico-მ ანონიმური წყაროებიდან შეიტყო, რომ CIA-ს, ანუ ცენტრალური სადაზვერვო სააგენტოს დირექტორმა ჯონ რეტკლიფმა, მოსკოვში ვიზიტისას 2 საკითხზე გააკეთა აქცენტი.
პირველი, მან მოუწოდა რუსეთის მაღალჩინოსნებს, არ გადადგან ისეთი ნაბიჯები, რამაც შეიძლება დაძაბულობა გაამწვავოს აშშ-ის ნატოელ მოკავშირეებთან, განსაკუთრებით ესტონეთთან, ლატვიასა და ლიეტუვასთან.
და მეორე, რეტკლიფმა სამშაბათს, 25 აგვისტოს, რუსეთის დედაქალაქში ვიზიტი ასევე გამოიყენა იმისთვის, რომ რუსეთისთვის მოეწოდებინა, შეემცირებინა სამხედრო და ეკონომიკური მხარდაჭერა ირანის მიმართ.
Politico-მ აღნიშნა, რომ 2021 წლის ბოლოს, პრეზიდენტ ჯო ბაიდენის ადმინისტრაციის დროს CIA-ს დირექტორმა, ბილ ბერნსმა გააფრთხილა რუსეთის მმართველი ვლადიმერ პუტინი უკრაინაში შეჭრის საფრთხეების შესახებ. სამი თვის შემდეგ რუსეთის ჯარებმა საზღვარი გადაკვეთეს.
ბოლო კვირებში რუსეთი არაერთხელ დაემუქრა ნატოს იმ ქვეყნებს, რომლებიც მხარს უჭერენ უკრაინას, რამაც გამოიწვია შიში, რომ მოსკოვმა შესაძლოა მიმართოს შემდგომ აგრესიულ ჰიბრიდულ ზომებს ან შეზღუდულ სამხედრო ქმედებებს ნატოს მოკავშირეების წინააღმდეგ.
მისი „შეხვედრის მთავარი მიზანი იყო რუსეთის გაფრთხილება ბალტიისპირეთის ქვეყნების წინააღმდეგ ნებისმიერი ესკალაციური ქმედებისგან“, – თქვა საკითხში გარკვეულმა წყარომ.
26 აგვისტოს, The Wall Street Journal-მა გაავრცელა ინფორმაცია, რომ ვიზიტის დროს რეტკლიფმა გააფრთხილა რუსეთი ნატოს ქვეყნებზე თავდასხმისგან, დამატებითი დეტალების დაკონკრეტების გარეშე.
იმავე დღის დილით, აშშ-ის პრეზიდენტმა დონალდ ტრამპმა რადიოინტერვიუში უარყო, რომ რეტკლიფის ვიზიტის მიზანი იყო პუტინის დარწმუნება, არ გამოეცადა ნატოს სიმტკიცე ან თავს არ დასხმოდა დიდ ბრიტანეთს (რომელმაც ამ კვირაში უკრაინის მხარდაჭერის გაძლიერების პირობა დადო). ტრამპმა ვიზიტს „ძალიან ნახევრად რუტინული“ უწოდა, თუმცა აღიარა, რომ მისი მიზანი ომის დასრულება იყო.
„ჩვენ გვსურს ვიხილოთ უკრაინის ომის დასრულება“, – აღნიშნა ტრამპმა.
კრემლმა, თავის მხრივ, განაცხადა, რომ CIA-ს ხელმძღვანელის ვიზიტი რუსეთისა და აშშ-ის სადაზვერვო სამსახურებს შორის კონტაქტებს უკავშირდებოდა.