„სტრატეგია აღმაშენებლის“ ლიდერს, გიორგი ვაშაძეს ე.წ. საბოტაჟის საქმეზე 30 000-ლარიანი გირაო შეეფარდა.
გიორგი ვაშაძეს ასევე დაევალა პირადობის მოწმობისა და პასპორტის ჩაბარებაც.
გადაწყვეტილება თბილისის საქალაქო სასამართლოს მოსამართლემ, მზია გარშაულიშვილმა, დღეს, 26 იანვარს მიიღო.
გიორგი ვაშაძემ ციხე 3 დღის წინ, 23 იანვარს დატოვა. მას მოსამართლე ნინო გალუსტაშვილმა 7-თვიანი სასჯელი „ქართული ოცნების“ პარლამენტში შექმნილი დროებით საგამოძიებო კომისიაზე გამოუცხადებლობისთვის მიუსაჯა.
როგორც გიორგი ვაშაძემ განაცხადა, გირაოს გადახდას აპირებს.
გიორგი ვაშაძის წინააღმდეგ სამართლებრივი დევნა დაწყებულია სისხლის სამართლის კოდექსის 318-ე მუხლის პირველი ნაწილით და 319-ე მუხლით – საბოტაჟის და უცხო ქვეყნისათვის მტრულ საქმიანობაში დახმარების ბრალდებით, რაც 15 წლამდე პატიმრობას ითვალისწინებს.
გიორგი ვაშაძის გარდა, სახელმწიფოს წინააღმდეგ ჩადენილი დანაშაულის ბრალდებით სამართლებრივი დევნა დაწყებულია ოპოზიციის კიდევ 7 ლიდერის მიმართ, მათ შორის: მიხეილ სააკაშვილის, ნიკა გვარამიას, ნიკა მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის მიმართ.