სოციალური კვლევისა და ანალიზის ინსტიტუტის (ISSA) კვლევის თანახმად, საქართველოს მოსახლეობის უმრავლესობის (59%) აზრით, დიდი ან სერიოზული საფრთხე არსებობს, საქართველოს შეუჩერდეს ევროკავშირის ქვეყნებში უვიზო მიმოსვლა.
„ქართული ოცნების“ ამომრჩეველთა ჯგუფში ამ საფრთხეს ხედავს მესამედი, ხოლო უმრავლესობა (53%) ფიქრობს, რომ ამის მცირე ან არავითარი საფრთხე არ არსებობს.
ფოტო: ISSA-ს კვლევიდან
კვლევის მიხედვით, იმ შემთხვევაში, თუ საქართველოს შეუჩერდება უვიზო მიმოსვლა, საქართველოს მოსახლეობის 54%-ის აზრით, ეს „ქართული ოცნების“ პასუხისმგებლობა იქნება.
რაც შეეხება უშუალოდ „ქართული ოცნების“ ამომრჩევლებს, მათი 40% ფიქრობს, რომ თუ უვიზო მიმოსვლა შეჩერდება, ეს ოპოზიციის პასუხისმგებლობა იქნება, 23% პასუხისმგებლობას ევროკავშირს აკისრებს. „ქართული ოცნების“ მხარდამჭერთა მხოლოდ 14% ფიქრობს, რომ უვიზო მიმოსვლა შეჩერდება, ეს მმართველი პარტიის პასუხისმგებლობა იქნება.
ფოტო: ISSA-ს კვლევიდან
ამავე კვლევის მიხედვით, „ქართული ოცნების“ ხელისუფლების პირობებში ევროკავშირში გაწევრების მოლოდინი არ აქვს: – საქართველოს მოსახლეობაში – 46%-ს.
ამასთან, „ქართული ოცნების“ ამომრჩევლების ჯგუფში თითქმის ყოველი მეორე (49%) ფიქრობს, რომ დღევანდელი ხელისუფლების პირობებში ევროკავშირში გაწევრება მოსალოდნელია.
ფოტო: ISSA-ს კვლევიდან
ISSA-ს კვლევის მიხედვით, საქართველოს მოსახლეობის 55% მიიჩნევს, რომ „ქართული ოცნების“ საგარეო კურსი რუსეთის და რუსეთთან დაახლოებული ქვეყნების ინტერესების გატარებას ემსახურება.
უშუალოდ „ქართული ოცნების“ ამომრჩევლების უმრავლესობის (66%) აზრით, მათი მხარდაჭერილი პარტია ეწევა დაბალანსებულ პოლიტიკას და კონკრეტულად არც ერთი ქვეყნის ინტერესებს არ ატარებს.
ფოტო: ISSA-ს კვლევიდან
ამავე კვლევის მიხედვით:
- ევროკავშირში საქართველოს გაწევრიანებას მხარს უჭერს საქართველოს მოსახლეობაში 83%. ეს მხარდაჭერა უშუალოდ „ქართული ოცნების“ ამომრჩევლებს შორის 68%-ია.
- ნატოში გაწევრიანებას მხარს უჭერს საქართველოს მოსახლეობის 68%
- რუსეთის მიერ შექმნილ კოლექტიური უსაფრთხოების ორგანიზაციაში (ოდკბ-ში) გაწევრიანებას მხარს საქართველოს მოსახლეობის მხოლოდ 9% უჭერს.
- საქართველოს ნეიტრალიტეტს მხარს უჭერს მოსახლეობის 52%. უშუალოდ „ქართული ოცნების“ ამომრჩევლებს შორის ნეიტრალიტეტს მხარს უჭერს 66%.
სოციალური კვლევისა და ანალიზის ინსტიტუტმა (ISSA) 2025 წლის ივნისში ჩაატარა სოციოლოგიური კვლევა, რომლის მიზანი იყო საქართველოს მოსახლეობის განწყობებისა და მოსაზრებების შესწავლა ქვეყანაში მიმდინარე პროცესებთან დაკავშირებით.
კვლევის მეთოდოლოგია:
- კვლევის ტიპი: რაოდენობრივი კვლევა
- სამიზნე ჯგუფი: საქართველოს სრულწლოვანი (18+) მოსახლეობა
- შერჩევით ერთობლიობა: 2000 რესპონდენტი
- მეთოდი: პირისპირ ინტერვიუ
- შერჩევა: ალბათური; კერძოდ, კლასტერული შერჩევა წინასწარი სტრატიფიკაციით
- შერჩევის ცდომილება: ±2.2% მთლიანი შერჩევისთვის, 95%-იანი სანდოობით
- გამოპასუხების წილი: 71%
- საველე სამუშაოები ჩატარდა 2025 წლის 17-29 ივნისის შუალედში.
- კვლევის დონორი: სამოქალაქო საზოგადოების ფონდი
კვლევის განმახორციელებელი: სოციალური კვლევისა და ანალიზის ინსტიტუტი (ISSA).