სალომე ზურაბიშვილის ირგვლივ გაერთიანებული “წინააღმდეგობის პლატფორმა” ეხმაურება ხვალ, 26 მაისს, რუსთაველის გამზირზე დაგეგმილ ღონისძიებებს საქართველოს დამოუკიდებლობის დღის აღსანიშნავად.
განცხადებაში ხაზგასმულია, რომ საზოგადოება ამ დღეს ქვეყნის დამოუკიდებლობის დღის საზეიმოდ იკრიბება. ასე პასუხობს პლატფორმა საუბრებს შესაძლო პროვოკაციების შესახებ.
“26 მაისი უმნიშვნელოვანესი დღეა საქართველოს ისტორიაში. დღე, როცა გამოცხადდა ადამიანის უფლებებზე, კანონის უზენაესობაზე, ჭეშმარიტ ქართულ, მაშასადამე, ევროპულ ღირებულებებზე დაფუძნებული, დამოუკიდებელი საქართველოს დემოკრატიული რესპუბლიკა. ეს საზეიმო დღეა საქართველოს თითოეული მოქალაქისათვის.
26 მაისს საქართველოს მთავარ გამზირზე სწორედ ამ სულისკვეთებით ვიკრიბებით – ერთად ვზეიმობთ საქართველოს დამოუკიდებლობას და კიდევ ერთხელ ერთხმად და ხმამაღლა ვაცხადებთ, რომ ჩვენი თაობა აუცილებლად განამტკიცებს ჩვენი ქვეყნის დამოუკიდებლობისა და თავისუფლების იდეას, დაუბრუნებს საქართველოს მის კუთვნილ ადგილს ერთიან ევროპულ ოჯახში.
“ქართული ოცნების” არალეგიტიმური რეჟიმი, რომელიც ძალადობისა და არასტაბილურობის მთავარი წყაროა, არ წყვეტს განცხადებებს თითქოს 26 მაისს ვინმე პროვოკაციულ ქმედებებს გეგმავს. მკაფიოდ ვაცხადებთ, რომ საქართველოს დამოუკიდებლობის დღეს რუსთაველის გამზირზე მრავალფეროვანი ქართული საზოგადოება იკრიბება ერთადერთი მიზნით – დამოუკიდებლობის დღის აღსანიშნად. ერთადერთი ძალა, რომელიც აწყობს პროვოკაციებს საკუთარი მოქალაქეებისა და სახელმწიფოს წინააღმდეგ არის ივანიშვილის რუსული რეჟიმი.
26 მაისს ყველას გეპატიჟებით რუსთაველის გამზირზე. ერთად აღვნიშნოთ საქართველოს დამოუკიდებლობის დღე!”, – ვკითხულობთ “წინააღმდეგობის პლატფორმის განცხადებაში.
26 მაისს, საქართველოს დამოუკიდებლობის დღეს, რუსთაველის გამზირზე არაერთი ღონისძიებაა დაგეგმილი. სამოქალაქო საზოგადოება და უწყვეტი, 6-თვიანი პროევროპული პროტესტში ჩართული სხვადასხვა მოძრაობა ერთიანდება ერთი სლოგანის გარშემო – “საქართველო კვლავ დაგიცავ”.
“საქართველოს დამოუკიდებლობის აღსანიშნავად რუსთაველის გამზირი მთელი დღის განმავლობაში უმასპინძლებს საქართველოს თავისუფლებისთვის დაუღალავად მებრძოლ საზოგადოებას. დილიდან გაიმართება ღონისძიებები, რომლებიც მიეძღვნება ჩვენს წარსულს, აწმყოსა და მომავალს”, – ვკითხულობთ დამოუკიდებლობის დღის ანონსში.
15:00 საათზე დაიწყება შეკრება რესპუბლიკის მოედანზე და შემდეგ მოეწყობა მსვლელობა დამფუძნებელი კრების სასახლემდე (დღევანდელი მოსწავლე ახალგაზრდობის სასახლე). 17:10 წუთზე შეკრებილები ერთად წაიკითხავენ საქართველოს დამოუკიდებლობის აქტს.