დღეს, 2 დეკემბერს, „ქართული ოცნების“ პრემიერ-მინისტრი ირაკლი კობახიძე საგარეო საქმეთა სამინისტროში მივიდა და უწყების თანამშრომლებს შეხვდა. მან „ქართული ოცნების“ მიერ ახლად დანიშნული საგარეო საქმეთა მინისტრი მაკა ბოჭორიშვილი წარადგინა.
იყო მოლოდინი, რომ კობახიძე უწყების ფართო შემადგენლობასთან აპირებდა შეხვედრას, მათ შორის იმ ადამიანებთან, ვინც “ოცნების” კურსის კრიტიკის შემცველ ერთობლივ წერილს მოაწერა ხელი. თუმცა საბოლოოდ, ნეტგაზეთის ინფორმაციით, კობახიძე მხოლოდ საგარეო საქმეთა სამინისტროს დეპარტამენტების ხელმძღვანელ პირებს შეხვდა. აქედანაც, ნეტგაზეთის ინფორმაციით, შეხვედრას არ ესწრებოდა რამდენიმე ისეთი ხელმძღვანელი პირიც, რომლებიც გაემიჯნენ „ქართული ოცნების“ გადაწყვეტილებას ევროინტეგრაციის შეჩერებასთან დაკავშირებით.
საგარეო საქმეთა სამინისტროში ირაკლი კობახიძის მისვლას წინ უძღოდა უწყების მოქმედი თანამშრომლების ერთობლივი განცხადება, სადაც ისინი ამბობენ, რომ 2028 წლამდე ევროკავშირში გაწევრიანების მოლაპარაკებების გახსნის ამოღება პოლიტიკური დღის წესრიგიდან წინააღმდეგობაში მოდის საქართველოს კონსტიტუციის 78-ე მუხლის მოთხოვნებთან. განცხადებას ამ დროისთვის 240-ზე მეტი თანამშრომელი აწერს ხელს.
გარდა ამისა, „ქართული ოცნების“ გადაწყვეტილების შემდეგ თანამდებობა დატოვეს ბულგარეთში, ლიეტუვაში, ნიდერლანდებში, ჩეხეთსა და აშშ-ში საქართველოს ელჩებმა, ასევე იტალიაში ელჩის მოვალეობის შემსრულებელმა. თანამდებობა დატოვა საგარეო საქმეთა მინისტრის მოადგილე თეიმურაზ ჯანჯალიამაც, რომელიც ევროკავშირის მიმართულებას კურირებდა.