უწყებაში აცხადებენ, რომ დაკავებულს ბრალად ედება ორი პირის მიმართ ჩადენილი ჯანმრთელობის განზრახ მძიმე დაზიანება. ბრალი დამტკიცების შემთხვევაში 9-13 წლამდე ვადით თავისუფლების აღკვეთას ითვალისწინებს.
როგორც ადგილობრივები მედიასთან აცხადებენ, შემთხვევა იმ საცხოვრებელ კორპუსში მოხდა, სადაც ნარიმან მაქარაშვილი (ბერი ნიკოლოზი) ცხოვრობს.
შსს-ში ამბობენ, რომ გამოძიების ვერსიით, ბრალდებულმა მიმდინარე წლის 24 აგვისტოს ზემო ფონიჭალის დასახლებაში მდებარე კორპუსში ორ პირს, 1997 წელს დაბადებულ დ.შ.- ს და 1972 წელს დაბადებულ მ.ზ. – ს ცივი იარაღის გამოყენებით სხეულზე დაზიანებები მიაყენა და შემთხვევის ადგილიდან მიიმალა.
უწყების ცნობით, დაშავებულები საავადმყოფოში გადაიყვანეს, სადაც შესაბამისი სამედიცინო დახმარება ჩაუტარდათ.
შსს-ის განცხადებით, პოლიციამ დანაშაულის ჩადენის იარაღი ნივთმტკიცებად ამოიღო.
გამოძიება საქართველოს სისხლის სამართლის კოდექსის 117-ე მუხლის მე-3 ნაწილით მიმდინარეობს.
