“ჩვენ სამძიმარს ვუცხადებთ ყველას, ვინც ადამიანური სისასტიკის მხვერპლი გახდა პარიზის ტრაგედიის შედეგად. სამძიმარს ვუცხადებთ მათ ნათესავებს, ახლობლებს, მეგობრებს – მთელ ფრანგ ხალხს.

127 დაღუპული, 200 დასახიჩრებული და დაზარალებული- ეს მხოლოდ ციფრებია. მაგრამ მათ მიღმა რეალური ადამიანების სიცოცხლეა. თითოეული ადამიანი მთელი სამყაროა, რომელიც მოიცავს ადამიანურ ურთიერთობებს, მეგობრობას, სიყვარულს, კონფრონტაციას ანუ ცხოვრების სრულ სისავსეს. ყურანი გვასწავლის, რომ გინდა ერთი ადამიანი მოგიკლავს და გინდა მთელი სამყარო ამოგიწყვეტია; გინდა ერთი ადამიანი გადაგირჩენია და გინდა – მთელი სამყარო.

პარიზის ტრაგედია კიდევ ერთხელ გვიჩვენებს, რომ სამყარო, სადაც ჩვენ ვცხოვრობთ, უაღრესად მოწყვლადია. ადრე თუ ფუფუნება იყო სხვადასხვა კულტურებსა და რელიგიებს შორის დიალოგი, ახლა ეს სასიცოცხლო მნიშვნელობის მქონე აუცილებლობაა. ამ ტრაგედიაში მსვერპლად უნდა მოვიაზროთ არა მარტო ისინი, ვინც სიცოცხლეს გამოასალმეს, არამედ ისინიც, ვინც დაგეგმა და განახორციელა ამ ტერორისტული აქტების სერიალი. ისინი ჩვენი დაჭრილი და დამახინჯებული კაცობრიობის ნაწილს წარმოადგენენ.

ტერორისტები ცდილობენ, რომ ჩვენი ყური შეაჩვიონ მათ საქმიანობას. მაგრამ თითოეული ჩვენგანის ვალია, უარი ვუთხრათ ძალადობას და ტერორიზმს არა მარტო პარიზში, ლონდონში და ნიუ იორკში, არამედ ყველგან, სადაც უდანაშაულო ადამიანების სისხლი იღვრება ასეთივე ადამიანების ხელით. იქნება ეს ბაღდადი, ქაბული, თუ ალეპო…

დროა, ყველამ მთელი ჩვენი ძალისხმევა კულტურებსა და ცივილიზაციებს შორის მშვიდობიანი ურთიერთობის დამყარებისა და შერიგების საქმეს მოვახმაროთ,” – ნათქვამია განცხადებაში. 

13 ნოემბერს ღამით პარიზში, ექვს სხვადასხვა ადგილას ერთდროულად მომხდარი აფეთქებებისა და შეიარაღებული თავდასხმების შედეგად, ბოლო მონაცემებით,  გარდცვლილთა რაოდენობა 128-მდე გაიზარდა, 99 ადამიანი კი კრიტიკულ მდგომარეობაშია. თუმცა რიცხვი შესაძლოა კიდევ გაიზარდოს. საფრანგეთის პრეზიდენტმა, ფრანსუა ოლანდმა ქვეყანაში საგანგებო მდგომარეობა გამოაცხადა. მისი ბრძანებით, საფრანგეთის სახმელეთო საზღვარი ჩაიკეტა.