ახალი ამბები

პრეზიდენტის ადმინისტრაცია: ფეხბურთელების დაჯილდოების განკარგულებები მაისში გამოვეცით, ცერემონია სექტემბერში გაიმართება

13 ივნისი, 2024 •
პრეზიდენტის ადმინისტრაცია: ფეხბურთელების დაჯილდოების განკარგულებები მაისში გამოვეცით, ცერემონია სექტემბერში გაიმართება

საქართველოს პრეზიდენტის ადმინისტრაცია დეზინფორმაციას უწოდებს სახელისუფლებო რიტორიკას, თითქოს პრეზიდენტი უარს აცხადებს ფეხბურთის ეროვნული ნაკრების წევრებისა და ფეხბურთის ეროვნული ფედერაციის წარმომადგენლების დაჯილდოებაზე.

პრეზიდენტის ადმინისტრაციის ინფორმაციით, სალომე ზურაბიშვილმა 2024 წლის 23 მაისს გამოსცა განკარგულებები, რითაც ღირსების ორდენით და მედლით დაჯილდოვდნენ წარდგენილი პირები, დაჯილდოების ცერემონია კი საქართველოში სექტემბერში გაიმართება.

„მაისის ბოლოს ორბელიანების სასახლეში იგეგმებოდა დაჯილდოების ოფიციალური ცერემონიის გამართვა, რაც ეროვნული ნაკრების წევრების საქართველოში არყოფნის გამო ვერ მოხერხდა. ეროვნული ნაკრების მორიგი შეკრება საქართველოში სექტემბრის დასაწყისში შედგება. სწორედ ამ დროისათვის, საქართველოს პრეზიდენტი ორბელიანების სასახლეში ჯილდოებს გადასცემს ნაკრების წევრებს და ფეხბურთის ფედერაციის წარმომადგენლებს“, — ნათქვამია პრეზიდენტის ადმინისტრაციის განცხადებაში.

საქართველოს ნაკრების ევროპის ჩემპიონატზე გასვლის შემდეგ, პრემიერ-მინისტრმა ირაკლი კობახიძემ და პარლამენტის თავმჯდომარემ შალვა პაპუაშვილმა პრეზიდენტს წარუდგინეს 53-კაციანი სია ფეხბურთელების, მწვრთნელების, ფეხბურთის ფედერაციის ხელმძღვანელობისა და ნაკრების პერსონალის ღირსების ორდენით დაჯილდოებისთვის.

დღეს, 13 ივნისს, თბილისის მერმა კახა კალაძემ თქვა, რომ სამწუხაროდ, ფეხბურთელების და ფეხბურთის ფედერაციის ხელმძღვანელების ღირსების ორდენზე წარდგენის საკითხს პრეზიდენტი ამ დრომდე არ გამოხმაურებია.

მასალების გადაბეჭდვის წესი