თოვლისა და დაბალი ტემპერატურის გამო როგორც შიდა, ისე საერთაშორისო მნიშვნელობის საავტომობილო გზებზე გარკვეული შეზღუდვებია დაწესებული.

საავტომობილო გზების დეპარტამენტის ინფორმაციით, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის გუდაური(ფოსტა)-კობის მონაკვეთზე აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა. სხვა სახის ავტომობილების მოძრაობა ამ მონაკვეთზე ზვავდამცავი გვირაბების გავლით იქნება შესაძლებელი. გაუჩერებლად შეეძლებათ მოძრაობა ავტომობილებს მლეთა-გუდურის მონაკვეთზეც.

ამ ორივე მონაკვეთზე მობილიზებულია საპატრულო პოლიცია და ავტომობილებს გადაადგილება მათი ზედამხედველობითდა კოორდინაციით შეეძლებათ.

პრობლემებია ნაქერალას უღელტეხილზეც – შიდასახელმწიფოებრივი მნიშვნელობის ქუთაისი(მოწამეთა)-ტყიბული ამბროლაურის საავტომობილო გზის 39-დან 52 კილომეტრამდე მონაკვეთზეც აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა. სხვა სახის ავტომობილების მოძრაობა თავისუფალია.

მისაბმელიანი, ნახევრადმისაბმელიანი და 30 ადამიანზე მეტი ტევადობის ავტობუსების მოძრაობა აკრძალულია ხაიში-უშგულის მონაკვეთზეც (შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის 70-დან 185 კილომეტრამდე მონაკვეთი). მაღალი გამავლობის – ორი და მეტი წამყვანი ხიდის მქონე ავტოტრანსპორტის მოძრაობა თავისუფალია. დანარჩენი ტიპის ავტომობილების მოძრაობა მხოლოდ მოცურების საწინააღმდეგო ჯაჭვების გამოყენებით იქნება შესაძლებელი.

მოძრაობა სრულად თავისუფალია ზუგდიდი-ხაიშის მონაკვეთზე.