დღეს, 9 ნოემბერს, აქტივისტებმა ლაზარე გრიგორიადისის სასამართლო სხდომაზე პლაკატები გაშალეს, წარწერით – „მადლობა ლაზარე“. პლაკატების გაშლას დარბაზში ტაში მოჰყვა.
„მადლობას იმსახურებს გუშინდელი დღისთვის და ყველაფერი უნდა გავაკეთოთ იმისთვის, რომ 15 დეკემბერს ჩვენთან ერთად იზეიმოს კანდიდატის სტატუსი!”, – დაწერა სხდომის დაწყებამდე აქტივისტმა თამთა გოგოლაძემ, პარტია “დროადან”.
თბილისის საქალაქო სასამართლოში ლაზარე გრიგორიადისის საქმეზე შემდეგი სხდომა 15 ნოემბერს, 12:00 საათზე გაიმართება.
გუშინ, 8 ნოემბერს, ევროკომისიამ რეკომენდაცია გაუწია საქართველოსთვის ევროკავშირის წევრობის კანდიდატის სტატუსის მინიჭებას. საბოლოო გადაწყვეტილებას ევროპული საბჭო 14-15 დეკემბერს მიიღებს.
21 წლის ლაზარე გრიგორიადისი პოლიციამ 29 მარტის ღამით დააკავა. მას ედავებიან რუსული კანონის წინააღმდეგ პარლამენტთან გამართულ აქციებზე პოლიციელთა მიმართ ძალადობასა და შსს-ს კუთვნილ ავტომობილზე ცეცხლის წაკიდებას. დაკავებულს 7-დან 11 წლამდე პატიმრობა ემუქრება.
გარდა ამისა, ლაზარე გრიგორიადისს 1 წლითა და 6 თვით პატიმრობა შეფარდებული აქვს მამის დაჭრის საქმეზე.
