Youtube მომხმარებლებს აფრთხილებს, რომ სასურველი კონტენტის სანახავად წაშალონ ბრაუზერის დამატებები, რომლებიც რეკლამებს ბლოკავს. როგორც The Wired წერს, ამ ეტაპზე შეზღუდვას გაფრთხილების სახე აქვს.
კერძოდ, პლატფორმა მომხმარებლებს აფრთხილებს და ad blockers-ის გათიშვას სთხოვს. იმ შემთხვევაში კი, თუ Youtube-ზე განთავსებული კონტენტის სარეკლამო ჭრების გარეშე ნახვა სურთ, სერვისის პრემიუმ ვერსია უნდა შეიძინონ, რომელიც თვეში $14 ღირს.
გამოცემა აღნიშნავს, რომ Youtube-ის ამგვარი მიდგომის შემდეგ, მომხმარებლებმა ბრაუზერის დამატებების წაშლა დაიწყეს. ერთ-ერთი ასეთი დამატების, AdGuard-ის შემქმნელები თქმით, მათ 75 მილიონი მომხმარებელი ჰყავთ, რომელთაგან 4.5 მილიონი ფასიანი გამომწერია. კომპანიისვე ცნობით, დღეში მათ დამატებას საშუალოდ 6 000 ადამიანი შლიდა, თუმცა 9 ოქტომბერს მათმა რიცხვმა 11 000-ს, 18 ოქტომბერს კი, ერთ დღეში, 52 000 მომხმარებელს მიაღწია. ოქტომბრის თვეში 30%-ით გაიზარდა წაშლის დღიური მაჩვენებელი კიდევ ერთი ასეთი დამატების, AdLock-ის შემთხვევაშიც.
რეკლამების შემზღუდავ აპლიკაცია Ghostery-ში კი, რომელმაც ოქტომბრის თვეში, მომხმარებლების უჩვეულოდ დიდი რაოდენობა დაკარგა, აცხადებენ, რომ იმ პირების 90%-მა, რომლებმაც მათი სერვისის გამოყენება შეწყვიტა, ამის მიზეზად მიუთითა, რომ ბრაუზერის დამატებას YouTube-ზე ვეღარ იყენებდა.