ახალი ამბებიეკონომიკა

საქართველოსა და არაბთა გაერთიანებულ საამიროებს შორის ეკონომიკური თანამშრომლობის ხელშეკრულება გაფორმდა

10 ოქტომბერი, 2023 • 9801
საქართველოსა და არაბთა გაერთიანებულ საამიროებს შორის ეკონომიკური თანამშრომლობის ხელშეკრულება გაფორმდა

საქართველოსა და არაბთა გაერთიანებულ საამიროებს შორის ყოვლისმომცველი ეკონომიკური თანამშრომლობის შესახებ ხელშეკრულება გაფორმდა.

ამის შესახებ ინფორმაციას ეკონომიკის სამინისტრო ავრცელებს.  გავრცელებული პრესრელიზის თანახმად,  დოკუმენტს დუბაიში დღეს  მოაწერეს ხელი საქართველოს ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა და საგარეო ვაჭრობის საკითხებში არაბთა გაერთიანებული საამიროების სახელმწიფო მინისტრმა, თანი ბინ აჰმედ ალ ზეიუდიმ.

სამინისტროს ცნობით, გაფორმებული შეთანხმების თანახმად, არაბეთის გაერთიანებული საამიროების 10- მილიონიანი სამომხმარებლო, მაღალმსყიდველობისუნარიანი ბაზარი გაიხსნება ქართული პროდუქციის 97,5%-ზე და შეთანხმება მოიცავს როგორც საქონლით, ასევე მომსახურებით ვაჭრობას და ვაჭრობასთან დაკავშირებულ სხვა სფეროებს.

ეკონომიკის სამინისტროს ინფორმაციით, 2023 წლის 8 თვის მონაცემებით, საქართველოსა და არაბთა გაერთიანებულ საამიროებს შორის სავაჭრო ბრუნვა წინა წლის ანალოგიური პერიოდის მაჩვენებელთან შედარებით 72%-ით გაიზარდა. უწყება ვარაუდობს, რომ თანამშრომლობის ხელშეკრულების გაფორმების შემდეგ ქვეყნებს შორის სავაჭრო ურთიერთობები კიდევ უფრო გაღრმავდება.

მასალების გადაბეჭდვის წესი