პარტია”მოქალაქეების” ლიდერის, ალეკო ელისაშვილის შეფასებით, აქციებზე დროებითი კონსტრუქციების მოწყობის წესის გამკაცრებით “ქართული ოცნებას” უნდა “პრევენცია იმის, რომ ხალხი ქუჩაში არ გამოვიდეს”.

მან გაიხსენა საქართველოში “ნაციონალური მოძრაობის” მმართველობის, ხოლო უკრაინაში ვიქტორ იანუკოვიჩის მმართველობის პერიოდი და განაცხადა, რომ პროტესტის შეჩერების მცდელობა “ამაო ძალისხმევაა”

“გავიხსენოთ ნაციონალური მმართველობის ბოლო წლები, როცა სწორედ გახშირებული მიტინგების და აქციების გამო მიიღეს ასეთი ცვლილება – თუ იქამდე სამთავრობო შენობებთან მიახლოება 20 მეტრზე ახლოს არ შეიძლებოდა, 50 მეტრამდე გაზარდეს ეს დისტანცია. პანტაპუნტით იჭერდნენ აქტივისტებს, მაგრამ, საერთო ჯამში, ამან არ უშველა. ზუსტად იგივეა, რისი ცვლილებაც ახლა თქვენ გინდათ – პრევენცია გინდათ იმის, რომ ქუჩაში ხალხი არ გამოვიდეს და თუ გამოვა, მეტი ბერკეტი გქონდეთ.

მოდით, ახლა კაცობრიობის ისტორიას გადავავლოთ თვალი, ჩვენ უახლოეს ისტორიასთან ერთად: სადაც კი რამე რევოლუცია მომხდარა და მღელვარებით, ქუჩაში აქციებით და გამოსვლით ხელისუფლება შეცვლილა, მთავარი მოქმედი პირი იქ იყო ხელისუფლება და მის მიერ დაშვებული შეცდომები – ის არ უგდებდა ყურს ხალხს, არ ფიქრობდა ხალხის პრობლემებზე, ხალხის რეალურ გასაჭირზე, სადღაც თავისას ერეკებოდა და ის შედეგები უდგებოდა ყველას, რა შედეგებიც დაუდგათ. იანუკოვიჩი იქნებოდა თუ საფრანგეთის რევოლუცია თუ ნებისმიერ სხვა. ასე რომ, აბსოლუტურად ამაო ძალისხმევით ხართ დაკავებულები. რატომ აკეთებთ ამას? რატომ ნაყავთ წყალს, როცა იცით, რომ წყლის დანაყვის შედეგად არაფერი არ დარჩება?”, – განაცხადა ელისაშვილმა.