ბათუმელები/ნეტგაზეთის დამფუძნებელი და დირექტორი მზია ამაღლობელი დააპატიმრეს. ბათუმელები/ნეტგაზეთი, როგორც დამოუკიდებელი და გავლენებისგან თავისუფალი მედიასაშუალება, რომელიც მზია ამაღლობელმა 2001 წელს დააფუძნა, მიიჩნევს, რომ ის არის რუსული რეჟიმის სინდისის პატიმარი, არ აპირებს შეგუებას, ითხოვს მის დაუყოვნებლივ გათავისუფლებას და აგრძელებს ბრძოლას სიტყვის თავისუფლებისთვის.

LGBTI Intergroup-ის წევრი ექვსი ევროპარლამენტარი „ალტ-ინფოს“ და „კონსერვატიული მოძრაობის“ დამფუძნებელ კონსტანტინე მორგოშიას სანქცირების მოწოდებით გამოდის.

LGBTI Intergroup არის ლგბტი ადამიანების უფლებების დამცველი, ევროპარლამენტის ყველაზე დიდი ჯგუფთაშორისი გაერთიანება, რომელიც მოიცავს 157 დეპუტატს ევროპარლამენტის თითქმის ყველა პოლიტიკური ჯგუფიდან.

ჯგუფის თანათავმჯდომარეები და ვიცე-პრეზიდენტები წერილით მიმართავენ ევროკომისიის პრეზიდენტ ურსულა ფონ ვერ ლაიენს, ევროპული საბჭოს პრეზიდენტ შარლ მიშელს, საქართველოში ევროკავშირის ელჩ პაველ ჰერჩინსკისა და თანასწორობის საკითხებში ევროკომისარ ელენა დალის. ისინი შეშფოთებას გამოთქვამენ 8 ივლისის პრაიდის ფესტივალის დახურული ღონისძიების ჩაშლის გამო და აცხადებენ, რომ ქვეყანაში, რომელსაც ევროკავშირის წევრობა სურს, ადამიანის ფუნდამენტური უფლებები დაცული უნდა იყოს. წერილში ნათქვამია, რომ საქართველოს ხელისუფლებამ უნდა უზრუნველყოს ყველა მოქალაქის შეკრებისა და გამოხატვის თავისუფლება და შეშფოთებაა გამოთქმული მზარდი ჰომოფობიური რიტორიკის გამო.

„მოგიწოდებთ, გადადგათ ყველა საჭირო ნაბიჯი ჰომოფობიური თავდასხმების უმკაცრესად დასაგმობად. ჩვენ მტკიცედ ვუჭერთ მხარს მიზანმიმართული სანქციების დაწესებას ჯგუფ „ალტ-ინფოს“ და ამ ჯგუფის უკან მყოფი ოლიგარქის კონსტანტინე მორგოშიას მიმართ“, — ნათქვამია წერილში.

მიმართვას ხელს აწერენ:

  • მარკ ანგელი, ევროპარლამენტის ვიცე-პრეზიდენტი
  • კიმ ვან სპარენტაკი
  • მარია ვოლში
  • პიერ კალესკინდი
  • მალინ ბიორკი
  • ფაბიო მასიმო კასტალდო
8 ივლისს დაგეგმილი პრაიდის ფესტივალი, რომელიც დახურულ სივრცეში, თბილისთან ახლოს, “ლისი ვონდერლენდის” ტერიტორიაზე უნდა გამართულიყო, ჩაიშალა. მიუხედავად იმისა, რომ ადგილზე მობილიზებული იყო პოლიცია და სპეცრაზმი, მოძალადე ჯგუფებს, რომლებიც ვაჟა-ფშაველას ძეგლთან შეიკრიბნენ, ფესტივალის მიმდებარე ტერიტორიამდე მისვლის შესაძლებლობა მისცეს. ამის გამო ფესტივალის ორგანიზატორებსა და მონაწილეებს ევაკუაცია დასჭირდათ. მათ ტერიტორია მიკროავტობუსებით დაატოვებინეს.პრაიდის ფესტივალის ტერიტორიაზე შეჭრისა და ინვენტარის განადგურების შემდეგ, ძალადობრივმა ჯგუფებმა ღონისძიებისთვის გამზადებული ალკოჰოლური და გამაგრილებელი სასმელები მოიპარეს და დალიეს, შემდეგ კი ილოცეს. იქვე იყო პოლიცია, რომელსაც სათანადო რეაგირება არ ჰქონია.პრაიდის ფესტივალის ორგანიზატორები, რომლებიც ტერიტორიიდან საევაკუაციო მიკროავტობუსებით გაიყვანეს, მიიჩნევენ, რომ თავდასხმა ლგბტქ+ აქტივისტებზე იყო შინაგან საქმეთა სამინისტროსა და „ალტ-ინფოს” ერთობლივი ოპერაცია.

როგორც ორგანიზატორებმა მანამდე თქვეს, დახურული ღონისძიების მიზეზი ის იყო, რომ 2021 წლის 5 ივლისს, როცა „თბილისი პრაიდი“ მარშს გეგმავდა, პოლიციამ ვერ უზრუნველყო აქტივისტების და ჟურნალისტების უსაფრთხოება, რის შედეგადაც მოძალადეები მედიის ათეულობით წარმომადგენელს დაესხნენ თავს. ძალადობრივი შეკრების ერთ-ერთი ორგანიზატორი მაშინაც „ალტ-ინფო“ იყო.

წელს ორგანიზატორები აღნიშნავდნენ, რომ შსს-სგან დახურული ღონისძიების დაცვის გარანტიები ჰქონდათ.

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.

ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.

დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.

წესებსა და პირობებს დეტალურად შეგიძლია გაეცნო მხარდაჭერის პლატფორმაზე.