„ქართული ოცნების“ თავმჯდომარე ირაკლი კობახიძე, ერთი მხრივ, აცხადებს, რომ ევროკომისიის შეფასება საქართველოს მიერ 12 რეკომენდაციის შესრულებაზე თავსებადია „ქართული ოცნების“ შეფასებასთან, მეორე მხრივ კი, ამბობს, რომ მანიპულაციაა, თითქოს 12-დან მხოლოდ 3 რეკომენდაცია შესრულდა.

„12-დან შესრულდა მხოლოდ 3 არის მანიპულაცია. ევროკომისარ ვარჰეის არ ვადანაშაულებ არაფერში. ჩვენი და ვარჰეის შეფასებებს შორის არის თავსებადობა. დღეს დეტალური ანალიზი იმისთვის კი არ წარმოვადგინეთ, რომ 12-ზე და 3-ზე გვესაუბრა, არამედ გვესაუბრა სიღრმისეულად. ევროკომისიამ იქვე წარმოადგინა ის 18 პუნქტი, რაც არის შესასრულებელი. და იმ 18 პუნქტს თუ ჩაუღრმავდებით, ნახავთ, რომ რეალურად, მთლიანობაში, ხარისხობრივად, რაც იყო 12 პრიორიტეტი, იმის 80% არის გაკეთებული. 18 პუნქტიდან 13 თუ 14 ეხება პრაქტიკის გაუმჯობესებას. გეუბნებიან, რომ არის კანონმდებლობა, კი ბატონო, კარგია და ახლა მიხედეთ პრაქტიკას“, — განაცხადა ირაკლი კობახიძემ.

თავად კობახიძის შეფასებით, ხელისუფლებამ შეასრულა 12-ივე პრიორიტეტი.

„რაღაცის არგაკეთებას არავინ გვედავება. პრაქტიკაზეა საუბარი… არის რამდენიმე თვე. ამ რამდენიმე თვის განმავლობაში პრაქტიკაც უნდა დაიხვეწოს და მზად ვართ სამ სფეროში კანონმდებლობასთან დაკავშირებით რეკომენდაციებისთვისაც“, — დასძინა კობახიძემ.

კობახიძემ ასევე თქვა, რომ არავის დაუყენებია მოთხოვნა, 12 პრიორიტეტი 100%-ით უნდა შესრულდეს.

ევროკომისიის შუალედური შეფასების თანახმად, საქართველომ სრულად შეასრულა სამი რეკომენდაცია, შვიდ რეკომენდაციაზე აქვს გარკვეული პროგრესი, შეზღუდულ პროგრესს მიაღწია დეოლიგარქიზაციის რეკომენდაციაში, ხოლო მედიის თავისუფლების პირობაში საერთოდ არ აქვს წინსვლა.

• 12 რეკომენდაცია: რა და როგორ (არ) შეასრულა საქართველომ