„ქართული ოცნების“ თავმჯდომარე ირაკლი კობახიძე ეხმიანება ბოლო დღეებში ძალადობრივი ჯგუფების ქმედებებს და აცხადებს, რომ ხელისუფლება პასუხისმგებლობას მხოლოდ გამოძიებაზე იღებს.
ჟურნალისტმა კობახიძეს ჰკითხა, იღებს თუ არა პასუხისმგებლობას იმ ორგანიზებულ ჯგუფებზე, რომლებიც განსხვავებული აზრის მქონე ადამიანებს დევნიან.
„ხელისუფლება პასუხისმგებლობას იღებს გამოძიებაზე, ბუნებრივია, საჭიროა ყველა ასეთი ფაქტის გამოძიება. რა თქმა უნდა, ძალადობა არის არასწორი, არის მიუღებელი და ამას სჭირდება, ბუნებრივია, გამოძიება და ხელისუფლების პასუხისმგებლობა არის ასეთი საკითხების გამოძიება.
ზოგადად, ჩვენი ქვეყნისთვის მთავარია, დასრულდეს პოლარიზაცია, შემცირდეს რადიკალიზმის ხარისხი. არიან კონკრეტული ძალები, რომლებიც პირდაპირ, ხელოვნურად ცდილობენ პოლიტიკური ვითარების პოლარიზებას, ცდილობენ რადიკალიზმის შემოტანას და, სამწუხაროდ, ეს ყველაფერი გადადის ხოლმე ძალადობაში. ეს არის ძალიან ცუდი, მე ყველას მოვუწოდებ, თავი შეიკავონ ნებისმიერი ისეთი ქმედებისგან, რომელიც წაახალისებს ქვეყანაში პოლარიზაციის გაღრმავებას“, — განაცხადა ირაკლი კობახიძემ.