ფინანსთა სამინისტროს საგამოძიებო სამსახურის ინფორმაციით, დაკავებულია კოოპერატივის ხელმძღვანელი, რომელმაც 500 ათასი ლარი მიითვისა.

როგორც უწყება ამბობს, გამოძიებით დადგინდა, რომ „სოფლის განვითარების სააგენტო“-სა და კახეთის რეგიონში რეგისტრირებულ ერთ-ერთ კოოპერატივს შორის, სახელმწიფო პროგრამის ფარგლებში გაფორმდა თანადაფინანსების ხელშეკრულება, რომლის საფუძველზეც სახელმწიფო აფინანსებდა კოოპერატივის მიერ ყურძნის მიღება- გადამუშავებისთვის საჭირო შესაბამისი ინვენტარის შეძენას, რისთვისაც მას გადაეცა თანხა 500 000 ლარის ოდენობით.

სამსახურის ცნობით, ბრალდებულმა თანხის დაუფლების მიზნით, გააყალბა ინვენტარის შეძენის დამადასტურებელი დოკუმენტაცია ასევე კერძო საექსპერტო დაწესებულების ექსპერტის მეშვეობით, მოიპოვა ყალბი დასკვნა ინვენტარის თითქოსდა ობიექტზე განთავსების თაობაზე. შემდგომ, ბრალდებულმა აღნიშნული ყალბი დოკუმენტაცია წარუდგინა სოფლის განვითარების სააგენტოს ნაკისრი ვალდებულებების შესრულების დასადასტურებლად, რა გზითაც, მართლსაწინააღმდეგოდ დაეუფლა სახელმწიფოს მიერ გაცემულ თანადაფინანსების თანხას – 500 000 ლარს.

გამოძიება მიმდინარეობს საქართველოს სისხლის სამართლის კოდექსის 210-ე[ყალბი საანგარიშსწორებო ბარათის დამზადება], 362-ე [ყალბი ოფიციალური დოკუმენტის დამზადება], 220 1 [გულგრილობა] და 182-ე [გაფლანგვა] მუხლებით, რაც სასჯელის სახით ითვალისწინებს თავისუფლების აღკვეთას 7-დან 11 წლამდე ვადით. ტარდება შესაბამისი ღონისძიებები სახელმწიფოსთვის მიყენებული ზიანის დაფარვის უზრუნველსაყოფად.