ავიაკომპანია „ჯორჯიან ეარვეისი“, მათ ოფისთან გამართული აქციის შემდეგ, თანამშრომლების სახელით განცხადებას ავრცელებს.

როგორც განცხადებაშია აღნიშნული, ავიაკომპანიის წინააღმდეგ დაწყებულია „ბინძური კამპანია“ და რუსეთთან ფრენების შესრულებაზე მზაობის გამო მათ მოღალატეებს დაუმსახურებლად ეძახიან.

„შორს ბინძური ხელები ჯორჯიან ეარვეისისგან! ბოლო დღეების განმავლობაში ხშირად მოვისმინეთ „ჯორჯიან ეარვეისის“ მიმართ შეურაცხმყოფელი განცხადებები რუსეთის მიმართულებით ფრენების აღდგენასთან დაკავშირებით.

ავიაკომპანიის წინააღმდეგ დაწყებულია ბინძური კამპანია, სრულიად დაუმსახურებლად “გვამკობენ” მიუღებელი ეპითეტებით. ყველაზე გულსატკენი არის ჩვენს პატრიოტულ გრძნობებზე მოყენებული თავდასხმა. მოღალატეებს გვეძახიან, რატომ ფიქრობთ რუსეთის მიმართულებით რეისების შესრულებაზეო. ყველა ამ უსაფუძვლო ბრალდების ავტორის გასაგონად გვსურს განვაცხადოთ, რომ სახელმწიფოებს შორის სავიზო რეჟიმის დაწესება ან მოხსნა, საავიაციო მიმოსვლის შეწყვეტა ან აღდგენა რომელიმე ავიაკომპანიის პრეროგატივა არ არის, ამას სახელმწიფოები წყვეტენ“, – ნათქვამია განცხადებაში.

როგორც „ჯორჯიან ეარვეისი“ განცხადებაშია ნათქვამი, კომპანია პოლიტიკური ორგანიზაცია არაა და პოლიტიკურ გადაწყვეტილებებს არ იღებს.

„ჩვენ ქართველი ხალხის დაკვეთა უნდა შევასრულოთ და საქართველოს მოქალაქეებს რა მიმართულებით ექნებათ მგზავრობის სურვილი, იმ მიმართულებებს უნდა მოვემსახუროთ. ქართველი ხალხის სამსახურში დგომის გარდა სხვა პოლიტიკა ჩვენ არ გაგვაჩნია.

ჩვენ ქართველი ხალხის ინტერესებს ომის პირობებშიც ვემსახურებოდით და მშვიდობის პირობებშიც მოვემსახურებით. „ჯორჯიან ეარვეისი“ ის ავიაკომპანიაა, რომლის დამფუძნებლები და თანამშრომლები ახდენდნენ აფხაზეთის ომის დროს ცეცხლმოკიდებული სოხუმიდან ბავშვების, ქალების, მოხუცებისა და დაჭრილების ევაკუაციას და გარდაცვლილი მებრძოლების გადმოყვანას საკუთარი სიცოცხლის რისკის ფასად. ბევრი მათგანი შეეწირა ამ საქმეს. ამიტომ, უნამუსობა, უტიფრობა და უსამართლობაა როდესაც ქვეყნის მოღალატეს უწოდებ იმ ხალხს, რომლებსაც საომარ ოპერაციებში მონაწილეობისთვის და იქ გამოჩენილი თავდადებისთვის სახელმწიფო ჯილდოები აქვთ მიღებული.

2008 წლის ომის დროს ჯორჯიან ეარვეისი იყო ერთადერთი ავიაკომპანია, რომელმაც არ შეწყვიტა ფრენები და საქართველოში ჩამოიყვანა ასობით უცხოელი ჟურნალისტი და პოლიტიკოსი, რომლებმაც მთელ მსოფლიოს აჩვენეს ქართველი ხალხის იმჟამინდელი ტრაგედია. მივმართავთ პროვიკატორებს, ამასაც ქვეყნის ღალატად აფასებთ?! თუმცა, თქვენისთანა გარეწრებისგან ესეც არ იქნება გასაკვირი.

აქვე ხაზგასასმელია, რომ „ჯორჯიან ეარვეისში“ ამჟამადაც დასაქმებულია საქართველოს ტერიტორიული მთლიანობისთვის მებრძოლი გმირები.
სამარცხვინოა, როცა ჩვენს კომპანიას ვინმე უბედავს მოღალატის დაძახებას“, – ნათქვამია კომპანიის განცხადებაში.

„ჯორჯიან ეარვეისის“ განცხადებით, კომპანიის წინააღმდეგ კამპანია „უცხოეთიდან მიღებული გრანტების“ მქონე ძალების მიერაა მართული.

„შეუიარაღებელი თვალითაც კარგად ჩანს, რომ ამ ბინძური კამპანიის უკან დგას ის მართული ძალები, რომლებიც უცხოეთიდან მიღებული გრანტების გასამართლებლად მზად არიან საკუთარი ქვეყნისა და ხალხის ინტერესის წინააღმდეგ წავიდნენ.

ჩვენ გვწამს ბრძენი ქართველი ხალხის, რომელიც საღად შეაფასებს შექმნილ ვითარებას და დადგება სიმართლის მხარეს. სიმართლე კი ერთია – „ჯორჯიან ეარვეისი“ იყო, არის და იქნება საქართველოსა და ქართველი ხალხის ინტერესების სამსახურში მდგომი ავიაკომპანია.

მოვუწოდებთ პოლიტიკას მიტმასნილ და ორ გროშზე დაგეშილ ავაზაკებს, ჩვენ მტრის არტილერიას, ტანკებსა და სამხედრო თვითმფრინავებს არ შევუშინებივართ და მითუმეტეს ვერ შეგვაშინებენ თქვენისთანა კომიკური არარაობები. ავიაკომპანიის წინააღმდეგ არც კი გაიფიქროთ რაიმე პროვოკაცია, თორემ მიიღებთ კანონით გათვალისწინებულ უმკაცრეს პასუხს“, – ნათქვამია „ჯორჯიან ეარვეისის“ თანამშრომლებს სახელით გავრცელებულ განცხადებაში.

კომპანია Georgian Airways-ს საქართველო-რუსეთს შორის პირდაპირი ფრენების განხორციელების ნებართვა მიეცა.

როგორც საქართველოს სამოქალაქო ავიაციის სააგენტოს განცხადებაშია ნათქვამი, კომპანია ფრენებს 20 მაისიდან დაიწყებს, თბილისი-მოსკოვი-თბილისის მიმართულებით.

კვირაში ამ მიმართულებით შვიდი ფრენა შედგება.

აქამდე სააგენტომ საქართველო-რუსეთს შორის რეისების განხორციელების ნებართვა რუსულ კომპანია „აზიმუტსაც“ მისცა. შეზღუდვა ორ ქვეყანას პირდაპირ ფრენებზე მოსკოვმა 10 მაისს გააუქმა.

რუსეთთან პირდაპი ფრენების გასაპროტესტებლად 16 მაისს აქცი გაიმართა Georgian Airways- ის ოფისთან.