საქართველოს ყოფილი პრეზიდენტის, მიხეილ სააკაშვილის განცხადებით, დღეს, 13 მარტს, ორჯერ დაკარგა გონება.
მის ოფიციალურ „ფეისბუქ“-გვერდზე გამოქვეყნებულ პოსტში ნათქვამია, რომ იგი „კარგად არ არის“, ხოლო პრემიერ-მინისტრის, ირაკლი ღარიბაშვილის მიუნხენის კონფერენციაზე გაკეთებული დაპირების მიუხედავად, მასთან ევროპელ ექიმებს არ უშვებენ.
- რა თქვა ღარიბაშვილმა მიუნხენის კონფერენციაზე – „ჩვენ შევთავაზეთ ოჯახს, ჩამოიყვანონ ნებისმიერი ექიმი“
სააკაშვილი აგრეთვე ამბობს, რომ საერთაშორისო არენაზე პოლიტიკოსები და სხვა პირები მის გათავისუფლებას ითხოვენ:
„საფრანგეთის პრეზიდენტმა, ყველანაირი დიპლომატიურობის გარეშე, ბრიტანეთის პრემიერთან საერთო ბრიფინგზე მოითხოვა ჩემი უპირობო გათავისუფლება.
ეს არის სრულიად უპრეცედენტო დემარში. წინა დღით საფრანგეთის მთავარმა გაზეთმა Le figaro-მ გამოაქვეყნა ჩემი ვრცელი ინტერვიუ.
მსოფლიოში სახელგანთქმულმა მოაზროვნემ ბერნარ ლევიმ ყველაზე მთავარ ამერიკულ ჟურნალში TIME-ში გამოაქვეყნა ჩემზე სტატია.
დღეს შემატყობინეს, რომ მომენიჭა ერთ-ერთი პრესტიჟული ევროპული პრემია“, – წერს სააკაშვილი.
ყოფილი პრეზიდენტი აგრეთვე ამბობს, რომ საქართველოში ყოფნის პერიოდში დახმარების სურვილი აქვს, ხოლო უკრაინაში დაბრუნების შემდეგ, შესაძლოა, „აქეთ გამოხედვის დროის რესურსიც აღარ ჰქონდეს“, ვინაიდან აქტიურად დაეხმარება პრეზიდენტ ვოლოდიმირ ზელენსკის.