საქართველოს პროკურატურის ინფორმაციით, ბრალი წარუდგინეს პირს, რომელიც სტუდენტობის მსურველებს არწმუნებდა, რომ როგორც თბილისის ტექნიკური უნივერსიტეტის დეკანს, შეეძლო ეროვნული გამოცდების ჩაბარების გარეშე ჩაერიცხა უნივერსიტეტში. უწყების ცნობით, ამის სანაცვლოდ დაზარალებულებს 3000-5000 ლარს ართმევდა.

ამასთან, უნივერსიტეტში ჩარიცხვის გარდა, პროკურატურის განცხადებით, დაზარალებულებს ატყუებდა, რომ არსებული სტუდენტური პროგრამის ფარგლებში, სტუდენტებისთვის თბილისში ბინების მინიმალურ ფასად – დაახლოებით 7000-11000 ლარის სანაცვლოდ გადაცემა შეეძლო.

“ბრალდებული აღნიშნული სქემის გამოყენებით 10 დაზარალებულის ფულად თანხას – ჯამში, 119 030 ლარს მოტყუებით დაეუფლა”, – ნათქვამია პროკურატურის განცხადებაში.

განცხადების თანახმად, აღნიშნული პირი 21 იანვარს დააკავეს და ბრალი სისხლის სამართლის კოდექსის 180-ე მუხლის მე-2 ნაწილის „ბ“ და მე-3 ნაწილის „ბ“ ქვეპუნქტით წარედგინა, რაც თაღლითობას გულისხმობს, რამაც მნიშვნელოვანი ზიანი გამოიწვია. დანაშაულის დამტკიცების შემთხვევაში ბრალდებულს 6-დან 9 წლამდე თავისუფლების აღკვეთა ემუქრება.

სისხლის სამართლის საქმეზე გამოძიება გრძელდება.