ევროპარლამენტმა რუსეთი ტერორიზმის სპონსორად სახელმწიფოდ გამოაცხადა.
ევროპარლამენტმა 494 ხმით, 58-ის წინააღმდეგ მიიღო რეზოლუცია უკრაინაში რუსეთის სასტიკი აგრესიული ომის უახლესი მოვლენების შესახებ. 44-მა დეპუტატმა თავი შეიკავა.
რეზოლუციაში აღნიშნულია, რომ რუსული ძალების და მათი მარიონეტული ძალების მიერ უკრაინაში მშვიდობიანი მოსახლეობის წინააღმდეგ ჩადენილი მიზანმიმართული თავდასხმები და სისასტიკეები, სამოქალაქო ინფრასტრუქტურის განადგურება და საერთაშორისო და ჰუმანიტარული სამართლის სხვა სერიოზული დარღვევები წარმოადგენს ტერორისტულ აქტებს და ომის დანაშაულს. ამის გათვალისწინებით, ისინი აღიარებენ რუსეთს, როგორც ტერორიზმის სახელმწიფო სპონსორს და როგორც სახელმწიფოს, რომელიც „ტერორიზმის საშუალებებს იყენებს“.
პარლამენტი მოუწოდებს ევროკავშირს, გააგრძელოს რუსეთის საერთაშორისო იზოლაცია, მათ შორის, როდესაც საქმე ეხება რუსეთის გაწევრიანებას საერთაშორისო ორგანიზაციებსა და ორგანოებში, როგორიცაა გაეროს უშიშროების საბჭო. ევროპარლამენტარებს ასევე სურთ რუსეთთან დიპლომატიური ურთიერთობების შემცირება, რუსეთის ოფიციალურ წარმომადგენლებთან ევროკავშირის კონტაქტების აბსოლუტურ მინიმუმამდე დაყვანა და ევროკავშირში რუსეთის სახელმწიფოსთან დაკავშირებული პროპაგანდისტული ინსტიტუტების აკრძალვა.
იმის გამო, რომ ევროკავშირს ამჟამად არ შეუძლია ოფიციალურად განსაზღვროს სახელმწიფოები ტერორიზმის სპონსორებად, პარლამენტი მოუწოდებს ევროკავშირს და მის წევრ ქვეყნებს, შექმნან შესაბამისი სამართლებრივი ბაზა და განიხილონ რუსეთის დამატება ასეთ სიაში. ეს გამოიწვევდა მთელ რიგ მნიშვნელოვან შემაკავებელ ზომებს მოსკოვის წინააღმდეგ და ფართოდ შემზღუდველ გავლენას მოახდენს ევროკავშირის რუსეთთან ურთიერთობებზე.
იმავდროულად, ევროპარლამენტარები მოუწოდებენ საბჭოს, რომ ევროკავშირის ტერორისტთა სიაში შეიყვანოს რუსული გასამხედროებული ორგანიზაცია „ვაგნერის ჯგუფი“, 141-ე სპეციალური მოტორიზებული პოლკი, რომელიც ასევე ცნობილია როგორც „კადიროველები“, და რუსეთის მიერ დაფინანსებული სხვა შეიარაღებული ჯგუფები, მილიცია და მარიონეტები.
ევროპის საბჭო იყო პირველი საერთაშორისო ორგანიზაცია, რომლის საპარლამენტო ასამბლეამაც (PACE) რუსეთის დღევანდელი რეჟიმი ტერორისტულად ცნო. ნატოს საპარლამენტო ასამბლეამ მიიღო რეზოლუცია, რომელიც ალიანსის წევრებს მოუწოდებს, ამჟამინდელი რეჟიმის პირობებში რუსეთი ტერორისტულ სახელმწიფოდ გამოაცხადონ. გარდა ამისა, რუსეთის ხელისუფლება ტერორისტულ რეჟიმად გამოცხადებული ჰყავს 6 ქვეყნის — უკრაინა, ლიეტუვა, ლატვია, ესტონეთი, პოლონეთი, ჩეხეთი — ეროვნულ პარლამენტს.
ამ თემაზე:
![„გავლენას იქონიებს [გაწევრიანების] პროცესზე“ — შარლ მიშელი „რუსულ კანონზე“](https://netgazeti.ge/wp-content/uploads/2023/05/charles.jpg "„გავლენას იქონიებს [გაწევრიანების] პროცესზე“ — შარლ მიშელი „რუსულ კანონზე“")
